Kaue: Əsgər Abdullayev Neftçidə atmosferi dəyişə bildi
"Neftçi"nin yarımmüdafiəçisi Kaue Topaz Premyer Liqasının 13-cü turu çərçivəsində "Xəzər Lənkəran"a qarşı keçirdikləri səfər oyunundan (2:0) sonra azerisport.az saytının suallarını cavablandırıb.
- Lənkərandakı oyunla bağlı nə deyə bilərsiniz?
- Yaxşı oyun oldu. Biz rəqibə qarşı yaxşı mübarizə apardıq. Vahid bir komanda kimi çıxış etdik.
- Əsgər Abdullayev komandada atmosferi dəyişə bilib?
- Bəli. Komandaya yeni baş məşqçi gələndə həmişə belə olur. Mənə elə gəlir ki, o, futbolçulara demək üçün düzgün sözlər tapmışdı. Hamı onu yaxşı başa düşdü və yaxşı oyun sərgilədi. Biz Samir Əliyevin dövründə də məşqlərdə çox çalışırdıq. Sadəcə, bu gün bizdə yaxşı oynamaq alındı.
- Elə isə, növbəti turlarda sizdən nə gözləyək?
- Bu cür oynamağa davam etməli və çempionatdakı liderliyimizi geri qaytarmalıyıq.
- "Neftçi"nin Müşahidə Şurasının sədri Çingiz Abdullayev oyundan sonra sizə nə dedi?
- Bizi təbrik etdi. Bildirdi ki, vacib qələbə qazandıq. Bu mövsüm "Xəzər Lənkəran"a qarşı keçirdiyimiz ilk oyunu yada saldı. Hansı ki, həmin görüşdə biz 2:0 öndə olduğumuz halda, sonda heç-heçəyə razılaşmışdıq.
- "Neftçi"nin son illərdə Lənkəranda ilk dəfə qələbə qazandığını bilirsiniz?
- Səkkiz il idi burada qələbə qazana bilmirdik. Nəhayət ki, buna nail olduq. Yaxşı nəticədir.
