Aleksandr İaşvili: Mən indi də İnterin hər bir uğuruna sevinirəm
"İnter"in sabiq hücumçusu Aleksandr İaşvilinin azerisport.az saytına müsahibəsi
- Deyəsən, siz daha bir neçə mövsüm oynamalı olacaqsınız...
- Xeyr, bu, o qədər də uzun çəkməyəcək. Sadəcə, hazırda Tiflis "Dinamo"suna kömək etməyə çalışıram.
- Siz nə vaxtsa "İnter"ə də kömək edirdiniz. Bakı klubunun işləri ilə maraqlanırsınız?
- Azərbaycan Premyer Liqası ilə maraqlanıram. Təbii ki, "İnter"in də çıxışından xəbərim var. Keçmiş klubumun yaxşı çıxış etməsi xoşdur. Bu klubun hər uğuru məni sevindirir. Çünki vaxtilə bu klubun bir hissəsi olmuşam.
- Zaur Svanadze ilə əlaqə saxlayırsınız?
- Svanadzeyə böyük hörmətim var, yaxşı insandır. Xoşdur ki, "İnter" onun rəhbərliyi altında uğurlu çıxış edir.
- Svanadze sizi "İnter"ə dəvət etsə, yenidən qayıdarsınız?
- Kömək edə bilmərəm. Mövsümün sonunda karyeramı başa vurmağı planlaşdırıram. Böyük ehtimalla növbəti mövsümdə futbol oynamayacağam.
- Çempionatımızla maraqlandığınızı dediniz. Nə xoşunuza gəlir?
- Güclü çempionatdır. Hazırda Premyer Liqanın iki lideri var - "Qarabağ" və "Qəbələ". Hazırda çempionluq uğrunda məhz bu iki klub mübarizə aparır. Hər ikisi Avropa Liqasının qrup mərhələsində oynayır. Halbuki, belə bir uğura imza atmaq çox çətindir. Amma klublarınız hədəflərinə çatmağı bacardılar. Fikrimcə, Avroliqada da pis çıxış etmirlər.
- "Qəbələ"nin "Dinamo"ya qarşı keçirdiyi təsnifat oyunlarını necə xatırlayırsınız?
- Bərabər səviyyəli oyunlar idi. Biz "Qəbələ"ni evdə məğlub etdik, amma səfərdə üstünlüyümüzü qoruya bilmədik və uduzduq. Həmin məğlubiyyət bizə çox pis təsir etdi.
- Tiflis klubu həmin vaxt "Qəbələ"yə qalib gəlsəydi, qrup mərhələsinə qədər irəliləyə bilərdi?
- Bilmirəm. Qrup mərhələsinə vəsiqə qazanmaq çətin işdir. Bizim indiki hədəfimiz Gürcüstan çempionu olmaqdır. Bunun üçün mübarizə aparırıq.
