Muarem Muarem: Belə olacağını bilsəydim, Qarabağdan getməzdim
"Qarabağ"ın sabiq yarımmüdafiəçisi, hazırda Türkiyənin "Əskişəhərspor" klubunda çıxış edən Muarem Muaremin azerisport.az saytına müsahibəsi
- "Əskişəhərspor"dakı işlərinizin heç də yaxşı getdiyini demək olmaz. Çünki sizi meydanda tez-tez görə bilmirik...
- Əlbəttə, işlər pis gedir. Hazırda sonuncu pillədə qərarlaşmışıq. 8 ardıcıl oyunda məğlubiyyətlə üzləşmişik. İki baş məşqçi istefaya göndərilib. Bura gələndən hələ meydanda çıxmaq şansı qazanmamışam. Niyə belə olduğunu özüm də başa düşə bilmirəm. Karyeramda ilk dəfədir belə halla rastlaşıram. Belə davam etsə, "Əskişəhərspor"da qalmağın mənası yoxdur.
- Mətbuatda Robert Prosineçkinin "Əskişəhərspor"u çalışdıracağı barədə xəbərlər yayılmışdı. Siz də bunu eşitmişdiniz?
- Prosineçki? Bunu ilk dəfədir eşidirəm. Burada belə bir söhbət olmayıb.
- Azərbaycan klublarından təklif almamısınız?
- Xeyr. "Əskişəhərspor"a gələndən sonra heç bir təklif almamışam.
- "Qarabağ"dan getdiyinizə görə təəssüflənmirsiniz?
- "Əskişəhərspor"da belə aqibətlə üzləşəcəyimi bilsəydim, təbii ki, "Qarabağ"dan getməzdim. Amma kim öncədən belə bir şeyi proqnozlaşdıra bilər?
- Yenidən bu kluba qayıtmağınız mümkündür? Klub prezidenti Tahir Gözəl bəyan etmişdi ki, Muarem Muaremlə Leroy Corc üçün darıxır...
- "Qarabağ"a qayıtmaqla bağlı heç nə deyə bilmərəm. Əlbəttə, qayıtmağı çox istərdim. Amma hələ heç nə bəlli deyil. "Qarabağ"da yaxşı günlərim olub. Tahir Gözəl gözəl insandır. O, bizi avrokuboklarda həmişə dəstəkləyirdi. Hər zaman bizimləydi, udanda da, uduzanda da.
- Azərbaycanda hələ də belə düşünürlər ki, "Qarabağ"ın yeni transferləri Muaremlə Leroyu layiqincə əvəz edə bilmirlər...
- Hər kəsin fikrinə hörmətlə yanaşıram. Komandaya yeni gələn futbolçunun dərhal oraya uyğunlaşması mümkün deyil. Zamanla hər şey qaydasına düşür. Klubdan gedəndən sonra azarkeşlərin hələ də məni sevməsini öyrənəndə çox sevindim. Onların mənim qayıtmağımı istədiyini görmək çox xoşdur. Hər həftə "Qarabağ" azarkeşlərindən mesajlar alıram.
- "Qarabağ"ın Avroliqadakı çıxışını izləyirsiniz? Komandanın qrupdan çıxmaq şansları barədə nə deyə bilərsiniz?
- Komandanın Avroliqadakı, Azərbaycan çempionatındakı çıxışını izləyirəm. "Qarabağ"ın Bakıda "Monako"ya qalib gələ bilməməsinə çox məyus oldum. İnanıram ki, onlar İngiltərə "Tottenhem"inə qalib gəlib, qrupdan çıxacaqlar.
