Rəşad Sadıqov: Baş məşqçi ilə söhbətdən sonra yığmada qalmağa qərar verdim
Azərbaycan yığmasının və "Qarabağ"ın kapitanı Rəşad Sadıqovun azerisport.az saytına müsahibəsi
- Azərbaycan yığması Moldova ilə yoxlama oyununda (2:1) necə təsir bağışladı?
- Maraqlı oyun izlədik. Hərdən komandamız təşəbbüsü əldən versə də, bütövlükdə, yaxşı futbol sərgilədi. Uşaqlar çoxlu qol vəziyyəti yaratmağa nail oldular. Sadəcə, onların hamısından yararlana bilmədilər. Əsas odur ki, qələbə qazandıq. Bu oyun gələcəyə ümidlə baxmağa əsas verdi.
- Azərbaycan yığmasındakı karyeranızla bağlı qərarınızı verdiniz?
- Baş məşqçi Robert Prosineçki ilə bu barədə üç dəfə söhbətimiz oldu. Sonuncu görüşün ardından millidəki karyeramı davam etdirməyə qərar verdim. Yığmada daha nə qədər oynayacağımı isə zaman göstərəcək.
- Deməli, özünüzü milliyə kömək etməyə hazır sayırsınız?
- Komandamıza faydalı olmaq üçün əlimdən gələni edəcəyəm. Əksini hiss etsəm, dərhal yığmadakı karyeramı başa vuraram.
- Bu ili yığmamız üçün necə qiymətləndirmək olar?
- 2015-ci ili uğurlu saymaq olar. 2014-cü il bizim üçün uğursuz alındı. Buna görə milliyə yeni baş məşqçi təyin olundu. Moldova ilə oyunda hücum etməyi, yaxşı kombinasiyalar qurmağı bacaran yığma komanda gördük. Bütün bunlar sevindirməyə bilməz. Fikrimcə, bu il bizdə yeganə alınmayan Bolqarıstanla görüşdə (0:2) özümüzü göstərə bilməməyimiz oldu. Hətta İtaliyaya 1:3 hesabıyla uduzduğumuz görüşdə də Sofiyadakından daha yaxşı oynamışdıq.
- Millinin sərgilədiyi oyun növbəti tsikl üçün ümid verir?
- Ümidlər çoxdur. Baş məşqçi də bizə inanır. O, hətta fərdi görüşlər zamanı da ümidini gizlətmir. Biz də növbəti tsiklin yığmamız üçün daha uğurlu olmasını istəyirik.
- Zədədən sonrakı vəziyyətiniz necədir? "Qarabağ"a Avropa Liqasının qrup mərhələsi çərçivəsində İngiltərə "Tottenhem"inə qarşı oyunda kömək edə biləcəksiniz?
- Həkimlər də bu oyuna qədər sıraya dönməyimə çalışırlar, özüm də. Amma nə dərəcədə hazır olacağıma yalnız oyun ərəfəsində aydınlıq gələcək. Hər gün saat 11:00-dan etibarən həkimlərin yanında 5-6 saat vaxt keçirirəm.
- Məşq edirsiniz?
- Hələ yox. Yalnız sabahdan (bu gün) 10-12 dəqiqə qaçmağıma icazə veriləcək.
