Robert Prosineçki: Milli komanda daha da güclü olacaq
Azərbaycan yığmasının baş məşqçisi Robert Prosineçki Moldovaya qarşı Bakıda keçirilmiş yoxlama oyunundan sonra fikirlərini bölüşüb. Azerisport.az xəbər verir ki, xorvatiyalı mütəxəssis 2:1 hesablı qələbədən sonra öncə bunları söyləyib:
“Birinci hissədə göstərdiyimiz oyun indiyəqədərki ən yaxşı oyunumuz idi. Doğrudur, fasiləyə az qalmış qapımızdan qol buraxdıq. Amma çox razı qaldım. Milli bu gün ümumi 90 dəqiqə ərzində yaxşı oyun göstərdi. Müxtəlif səbəblərdən Rəşad Sadıqov, Ruslan Abışov, Dmitri Nazarov, Eddi İsrafilov və Araz Abdullayev kimi əsas futbolçularımız bu gün bizə kömək edə bilmədilər. Əvəzində çoxlu sayda gənc oyunçuya şans verdim və onların da çıxışından razı qaldım. İnanırıq ki, növbəti seçmə mərhələdə Azərbaycana gələcək komandaları çətin oyun gözləyəcək”.
"Yeni futbolçular ümidlərimi doğrultdular. Pavel Paşayevlə Rəhman Hacıyev bu gün ilk dəfə yığmanın start heyətində meydana çıxdı. İkinci hissədə daha gənc oyunçuları meydana buraxdıq. Daha çox Ağabala Ramazanovu qeyd etmək istəyərdim. Çünki o, bu gün qol da vurdu. Amma bütövlükdə, futbolçuların hər birindən razıyam".
Xorvatiyalı mütəxəssisin sözlərinə görə, yığmamız bundan da yaxşı oynaya bilər: "Eddi İsrafilov İspaniyanın "Eybar" klubunun əsas heyətində oynamağa başlayıb. Dmitri Nazarov Almaniyanın "Karlsrue" klubunda çıxış edir. Uzun müddətdir zədəsini sağaltmaqla məşğul olan Namiq Ələsgərovu da unutmamaq lazımdır. Cavid Hüseynovun da futbola qayıdacağına inanıram. Ona görə də yığma komanda daha güclü olacaq".
Gələcək Rəşad Sadıqovu müdafiə xəttində kimin əvəzləyəcəyinə dair suala Prosineçkinin cavabı belə oldu: "Rəşad yığma karyerasını başa vursa, onun mövqeyinə hələ real namizədimiz yoxdur. Maksim Medvedev? Bəli, o, bu mövqedə bir neçə dəfə oynayıb. Amma müdafiənin mərkəzi onun yeri deyil".
Xorvatiyalı mütəxəssis ötən gün Rusiyanı 3:0 hesabıyla məğlub edən gənclərdən ibarət yığma komandamız barədə də söz açıb: "Azərbaycanın gənclərdən ibarət yığmasının bütün oyunlarına baxıram. Elvin Camalovla Elnur Cəfərov Rusiyaya qarşı çıxış etdilər. Fikrimcə, U-21-in bu gün vacib oyunu olmasaydı, onlar Moldovaya qarşı oynaya bilərdilər".
Prosineçki Almaniyanın "Germaniya Halberştadt" klubunda forma geyən Rüfət Dadaşovu milliyə çağırmamasına da aydınlıq gətirib: "O, Almaniyanın 4-cü liqasında çıxış edir. Siz 4-cü liqada çıxış edən futbolçunu Azərbaycan Premyer Liqasında top qovan oyunçulardan güclü hesab edirsinizsə, onda biz nəyisə düz etmirik. Onda mən burada əbəs yerə çalışıram. Mən Rüfəti yığmanın hücum xəttinə alternativ görmürəm".
