Şəhriyar Əliyev: Çempionatda asan rəqib yoxdur
“Qarabağ”la oyunun hazırlığına dünəndən başlamışıq. Hər şey yaxşıdır, meydana bizə lazım olan nəticəni qazanmaq üçün çıxacağıq”. Azerisport.az xəbər verir ki, bu sözləri “Kəpəz”in müdafiəçisi Şəhriyar Əliyev deyib.
Klubun rəsmi saytına danışan Əliyev Topaz Premyer Liqasının 13-cü turunda komandasının Ağdam klubu ilə keçirəcəyi oyunla bağlı fikirlərini açıqlayıb: “Düşərgədə əhval-ruhiyyə yaxşıdır. Hamı qarşıdakı oyunun əhəmiyyətini yaxşı başa düşür. Bu haqda futbolçulara əlavə nəsə deməyə ehtiyac yoxdur. Güclü rəqibə qarşı mübarizə aparacağıq”.
AZAL-la yoxlama oyununda yüngül zədə alan Şəhriyar artıq komanda ilə birgə məşqlərə çıxır: “İndi özümü yaxşı hiss edirəm, ayağım əzilmişdi. Heyətdə cəza və zədəli futbolçularımız var. Bununla belə, güclü rəqibə qarşı layiqli futbol oynamağa çalışacağıq. Çətin oyun olacaq. Çempionatda asan rəqib yoxdur, “Qarabağ”ı da hamı yaxşı tanıyır. Biz də özümüzə güvənirik”.
Xatırladaq ki, ilk dövrədə bu komandalar arasında Gəncədə keçirilən oyunda “Qarabağ” 3:2 hesabı ilə qalib gəlmişdi.
