Vyaçeslav Sofroni: Azərbaycanla oyun Moldova üçün çox yaxşı şansdır
Moldova yığmasının və "Bakı"nın sabiq hücumçusu Vyaçeslav Sofroni Azərbaycana qarşı yoxlama oyunu öncəsi azerisport.az saytının suallarını cavablandırıb.
- Azərbaycan - Moldova oyunundan nə gözləyirsiniz?
- Əminəm ki, çox maraqlı oyun olacaq. Yığmamız AÇ-2016-nın seçmə mərhələsi çərçivəsində uğursuz çıxış etdi. Mənim fikrimcə, Azərbaycanla oyun bu baxımdan millimiz üçün çox vacibdir. Çünki yaxşı nəticə komandamızın özünə gəlməsinə kömək edə bilər. Bilirəm ki, yığmamız qələbə qazanmaq üçün əlindən gələni edəcək.
- Bu oyun Moldova yığmasına nə verəcək? Daha güclü rəqiblə oynaya bilməzdinizmi?
- Azərbaycan üzərində qələbə komandada özünəinamı geri qaytaracaq. Bundan əlavə, bu oyun gənclər üçün özlərini göstərmək baxımından bir şansdır. Onlar özlərini yaxşı tərəfdən göstərə bilsələr, yaxşı maliyyə imkanları olan klubların diqqətini cəlb edə bilərlər. Bir sözlə, Azərbaycanla oyun Moldova üçün yaxşı şansdır.
- Moldova futbolunun səviyyəsi hazırda elə də yüksək deyil. Sizcə, bunun səbəbi nədir?
- Bəli, hazırda yığmamız elə də yüksək səviyyədə çıxış etmir. Çox təəssüf ki, Moldova çempionatının da səviyyəsi aşağıdır. Hazırda daxili çempionatda çempionluq uğrunda elə də yüksək rəqabət yoxdur. Klubların sayı elə də çox deyil. Müəyyən problemlər var ki, onlar klubların, futbolçuların inkişafına mane olur.
- Moldova yığmasının futbolçularını güclü saymaq olar?
- Yığmaya hazırda ən yaxşı futbol sərgiləyən futbolçular dəvət olunublar. Onlar indi optimal formadadırlar. Çox istəyərdim ki, uşaqlar Bakıda yaxşı oyun sərgiləsinlər, qələbə qazansınlar. Çünki bu qələbə yığmamıza çox lazımdır.
- Bəs proqnozunuz necədir?
- Proqnoz verməyəcəyəm. Çox istəyərdim ki, komandalar dinamik, maraqlı futbol sərgiləsinlər, amma sonda qələbəni bizim yığma qazansın.
- Azərbaycan yığması barədə fikirləriniz necədir?
- Onlar üçün kollektiv oyun daha vacibdir. Bu, yığmanıza uğur qazandıra bilər. Azərbaycan yığmasının necə yaxşı oyun sərgilədiyini dəfələrlə görmüşəm. Buna da yalnız kollektiv oyun sayəsində nail olublar. Azərbaycan yığması taktiki baxımdan yaxşı hazırlığa malikdir. İntizamlı oynamağa da xüsusi diqqət yetirirlər. Futbolçular özlərinə inananda, bu, uğur qazanmağa kömək edir. Buna misal olaraq Türkiyə üzərindəki qələbəni göstərmək olar.
