Nazim Süleymanov: Bütün görüşlərdə belə oynamaq lazım idi

19 yaşadək futbolçulardan ibarət Azərbaycan yığmasının baş məşqçisi Nazim Süleymanov AÇ-2017-nin seçmə mərhələsi çərçivəsində Bosniya və Herseqovinaya qarşı keçirdikləri oyundan sonra fikirlərini bölüşüb. Azerisport.az xəbər verir ki, o, 1:0 hesabıyla qalib gəldikləri görüşü belə şərh edib:

"Qələbə qazanmağımıza baxmayaraq, elit mərhələyə vəsiqə qazana bilmədik. Bütün görüşlərdə belə oynamaq lazım idi. Uşaqlar mübarizə apardılar, verilən tapşırıqları yerinə yetirməyə çalışdılar. Futbolda bəxt amili də var. Məsələn, ötən görüşdə qələbə qazansaydıq, bu gün tam fərqli bir nəticəyə imza ata bilərdik".

Süleymanov U-19-dakı fəaliyyətinə belə qiymət verib: "Mənim vaxtım az idi. Mən uşaqların heç də hamısını yaxşı tanımırdım. Amma indi kimin necə çıxış etdiyini bilirəm. Futbolda məğlubiyyətlər də olur. Lakin istənilən halda hər oyunda sonadək mübarizə aparmaq lazımdır. Futbolçu meydanda sonadək mübarizə aparmırsa, deməli, o, gələcəkdə böyük futbolçu ola bilməyəcək". (CBC)