Şahruddin Məhəmmədəliyev: Almaniya ilə oyunda hər şey gözlədiyimiz kimi alındı

21 yaşadək futbolçulardan ibarət Azərbaycan yığmasının və "Sumqayıt"ın qapıçısı Şahruddin Məhəmmədəliyev AÇ-2017-nin seçmə mərhələsi çərçivəsində Almaniyaya qarşı keçirdikləri səfər oyunundan (1:3) sonra azerisport.az saytının suallarını cavablandırıb.

- Oyunla bağlı nə deyə bilərsiniz?
- Bizi çətin oyun gözlədiyini yaxşı bilirdik. Dolu tribunalar qarşısında oynamaq çətin idi. Almanlar bizimlə görüşdə çox yaxşı dəstəyə malik idilər. Hər şey gözlədiyimiz kimi alındı. Çox çalışsaq da, məğlub olduq.

- Hesabı öncə yığmamız açdığı halda, niyə üstünlüyü qoruya bilmədiniz?
- Çünki Almaniyaya qarşı onun meydanında ancaq müdafiədən oynamaq və qol buraxmamaq çox çətindir. Rəqibin heyətində çoxlu yüksək səviyyəli futbolçu var. Bizimlə oyun bunu bir daha göstərdi. Onların qarşısını almaq çox çətin idi.

- Bakıda 0:3 hesabıyla uduzduğunuzu nəzərə alsaq, səfərdə 1:3 hesabı yaxşı nəticə sayıla bilər?
- Məğlubiyyəti yaxşı nəticə saymaq olmaz. Çünki uduzmaq həmişə pis nəticə sayılır. Bu, kimə qarşı, necə oynamağından asılı olmayaraq, belədir. Biz uğurlu nəticə qazanmaq istəyirdik. Amma təəssüf ki, alınmadı. Halbuki, bəzi epizodlarda buna  yaxın idik.

- Məqsəd İsayevin qolu yəqin ki, sizin üçün gözlənilməz oldu...
- Deməzdim ki, gözlənilməz alındı. Amma onu da başa düşürdüm ki, bu qol almanları daha da istəkli mübarizə aparmağa məcbur edəcək. Elə də alındı.

- Qarşıda Rusiya ilə ev oyunu var. Bu görüşdə xal qazana biləcəksiniz?
- Hər şey mümkündür. Bizi maraqlı oyun gözləyir. Yaxşı nəticə qazanmağa çalışacağıq. Buna nə dərəcədə nail olacağımızı noyabrın 17-dəki oyun göstərəcək. Rusiya da güclü komandadır. Onlar son turda Farer adalarına qalib gəliblər.