Derlis Meza Kolli: Premyer Liqa əvvəlki mövsümlərlə müqayisədə çox zəifləyib
"Qəbələ"nin yarımmüdafiəçisi Derlis Meza Kollinin azerisport.az saytına müsahibəsi
- Artıq iki aydır "Qəbələ"də çıxış edirsiniz. Amma biz hələ də "İnter"də inamlı çıxışı ilə diqqət çəkən Derlisi görə bilməmişik. Yəni sizin "Qəbələ"yə uyğunlaşmağınız üçün əlavə vaxta ehtiyacınız var?
- Xeyr, fikrimcə, buna vaxt lazım deyil. Mən əvvəlki oyunumu sərgiləməyə çalışıram. Sadəcə, "Qəbələ" mənim üçün yeni klubdur. Mümkün qədər çox faydalı olmağa çalışıram. Yəni elə əvvəlki Derlisəm.
- Dortmundda Almaniya "Borussiya"sına qarşı keçirdiyiniz son Avroliqa matçında 0:4 hesabı ilə uduzdunuz. Demək olar ki, sizin pley-offa çıxmağınız artıq arzu olaraq qalacaq?
- Biz "Borussiya"ya ardıcıl iki oyunda uduzmaq istəmirdik. Hədəfimiz uğur qazanmaq idi. Amma buna nail ola bilmədik və yenə məğlubiyyətlə üzləşdik.
- Qarşıda PAOK və "Krasnodar"la oyunlar var. Bu görüşlərdən hansında sizdən qələbə gözləyək?
- Hər iki görüş çətin olacaq. Çünki Avroliqada asan oyun olmur. Yunanıstanda qələbəyə oynayacağıq. Qələbə qazansaq, şansımızı artıra bilərik.
- "Qəbələ" Premyer Liqadakı son dörd oyununda da qələbə qazana bilməyib. Bunun səbəbi nədir?
- Elitada çıxış edən bütün klublar gücləniblər. Onların hamısı bizə qarşı böyük motivasiya ilə oynayırlar. Ümid edirəm ki, uğursuz oyunlarımızın hamısı geridə qalıb və bundan sonra qələbələrə qazanmağa başlayacağıq və xal itirməyəcəyik.
- Bu xal itkiləri "Qəbələ"ni çempionluq mübarizəsindən kənar qoya bilər. Çünki hazırda lider "Qarabağ" rəqib tanımır...
- Bu il çempionat əvvəlki mövsümlərlə müqayisədə çox zəifdir. Aydın məsələdir ki, çempionluq uğrunda cəmi iki klub mübarizə aparır. Biz "Qarabağ"la rəqabət yaratmaq istəyiriksə, xal itirməməliyik.
- Azərbaycan Premyer Liqasında çıxış etməklə Paraqvay yığmasına dəvət almaq çox çətindir?
- Mən Paraqvay yığmasında oynamağı arzulayıram. İnanıram ki, nə vaxtsa ölkəmin yığma komandasının formasını geyinəcəyəm.
- Bəs Azərbaycan yığmasına çıxış etmək barədə düşünməmisiniz?
- Azərbaycandakı karyeramdan, burada tanıdığım insanlardan razıyam. Vətənimdən çox uzaqda olsam da, özümü Bakıda evimdəki kimi hiss edirəm. Bu cür münasibətə görə hər kəsə təşəkkürümü bildirirəm. Təbii ki, Azərbaycan yığmasında oynamaqla bağlı təklif alsam, bu barədə ciddi düşünərəm.
