Səməd Qurbanov: Samir Əliyevin aqibətinə Müşahidə Şurası qərar verəcək

"Neftçi"nin Müşahidə Şurasının üzvü Səməd Qurbanovun azerisport.az saytına müsahibəsi

- Premyer Liqanın son turuna təsadüf edən "Rəvan"a məğlubiyyətdən (2:3) sonra çox dilxor görünürdünüz...
- Komanda bu qədər pis oynayırsa, çempionatın autsayderinə uduzursa, necə olmalı idim?

- "Neftçi"də nə baş verir?
- Mən futbolçularımızın niyə belə oynadığını başa düşə bilmirəm. Onlar belə böyük komandaya düşüblər. Məgər onlar harada oynadıqlarını anlamırlar?

- Bəlkə müqavilə imzalayarkən onlara bunu yaxşı başa salmayıbsınız...
- Onlara hər şey izah olunub. Özləri də hər açıqlamada "Neftçi"nin necə böyük klub olduğunu deyirlər. Amma nədənsə bu, oyunda öz əksini tapmır. Oyundan sonra "Rəvan"dan buraxdığımız qollara bir neçə dəfə baxmışam. Bu necə mümkündür axı? Başa düşə bilmirəm.

- Nə etməyi düşünürsünüz?
- Yaxın günlərdə Müşahidə Şurasının iclası keçiriləcək. Orada qərar verəcəyik.

- Bəlkə futbolçuları cərimə etmək lazımdır?
- Yadınızdadırsa, biz futbolçulardan əvəzedici komandaya da göndərmişdik. Pul cəriməsinə gəlincə, bu məsələ də Müşahidə Şurasında müzakirə olunacaq.

- Samir Əliyevə hörmətimiz olsa da, sizə elə gəlmir ki, komandanı bu vəziyyətdən ancaq təcrübəli məşqçi çıxara bilər?
- Gəlin bir qədər gözləyək. Müşahidə Şurasında hər şeyə qərar veriləcək.

- Qarşıda "Böyük oyun" var. Növbəti məğlubiyyətdən ehtiyatlanmırsınız?
- Buna yol vermək olmaz. Komandanı "Xəzər Lənkəran"la oyuna qədər toparlamaq lazımdır. Onlar sınmamalıdırlar.