Vaqif Sadıqov: Bu yığmadan daha artığını gözləyirdik
AFFA Məşqçilər Komitəsinin sədri Vaqif Sadıqov Azərbaycanın 19 yaşadək futbolçulardan ibarət yığma komandasının AÇ-2017-nin seçmə mərhələsi çərçivəsində Ukrayna (0:4) və Türkiyəyə (0:1) məğlubiyyətini şərh edib. Azerisport.az saytına açıqlamasında o, bunları söyləyib:
"Komandamız Ukrayna və Türkiyəyə məğlub olsa da, turnir hələ başa çatmayıb. Cüzi də olsa, şans qalır. Məsələn, Bosniya və Herseqovina üzərində 2:0 hesablı qələbə bizə şans yarada bilər. Amma biz bu komandadan bütövlükdə daha çox şey gözləyirdik. Ötən mövsüm bu komanda elit mərhələdə çıxış etmişdi. Demək olar ki, elə həmin heyət qorunub. Onların indi belə uğursuz çıxış etməsi bizi məyus edir. Çünki bu futbolçular milli komandamızın yaxın ehtiyat qüvvəsi sayılır. Onların çıxışı bizi və məşqçiləri sevindirə bilməz. Qarşıda bosniyalılarla həlledici oyun var. Komandamız Türkiyəyə qarşı Ukrayna ilə müqayisədə daha yaxşı oynadı. Üçüncü oyunda futbolçularımızın daha yaxşı çıxış edəcəklərinə ümid edirik".
