Nazim Süleymanov: Nə belə oyun, nə də belə nəticə gözləyirdim
19 yaşadək futbolçulardan ibarət yığma komandamızın baş məşqçisi Nazim Süleymanov AÇ-2016-nın seçmə mərhələsi çərçivəsində Türkiyəyə qarşı keçiriləcək oyun öncəsi azerisport.az saytının suallarını cavablandırıb.
- Öncə Ukraynaya böyük hesablı məğlubiyyətlə bağlı fikirlərinizi bilmək istəyərdik...
- Oyunla bağlı yaxşı fikirlər söyləmək olmaz. Gənc futbolçulara belə məğlubiyyətlə barışmaq çox çətindir. Əsas odur ki, onlar həmin gün futbol oynamadıqlarını başa düşsünlər. Topu sadəcə, qabağa vurmaq futbol deyil. İstənilən hesabla qalib də gəlmək olar, uduzmaq da. Amma əsas futbol oynamaqdır. Biz heç qol vəziyyəti yarada bilmirdik. Bu turnir bizim üçün vacib əhəmiyyət daşıyır. Amma eyni zamanda futbolumuzun gələcəyini düşünməliyik. Çünki bu futbolçular bizim gələcəyimizdir. Onlar da indidən futbol oynamağa başlamalıdırlar.
- Sizin üçün bu nəticə gözlənilməz olmadı?
- Şübhəsiz ki, mən nə belə oyun, nə də nəticə gözləyirdim. Bu, məni narahat edir. Çünki biz top saxlamağı, hücum etməyi bacarırıq. sadəcə, birinci oyunda bunu bacarmadıq. Uşaqlarda bir qədər həyəcan var idi.
- Ola bilər ki, siz də haradasa səhv etmisiniz?
- Komanda uduzubsa, hər kəs günahkardır. Amma digər tərəfdən mən meydana çıxıb onlarla birgə qaçmalı deyiləm. Futbol səhvlərdən ibarət oyundur. 90 dəqiqə diqqətli oynamaq lazımdır ki, bu səhvlərin sayı az olsun.
- Komandamızın qrupdan çıxmaq şansları barədə nə düşünürsünüz?
- Ukrayna qrupun ən yaxşı komandasıdır. 0:4 heç də bizim nəyə qadir olduğumuzun göstəricisi sayıla bilməz. Turnir doğma meydanımızda keçirilir və bundan maksimum istifadə etməliyik. Bundan sonrakı oyunlarda mütləq qələbə qazanmalıyıq.
- Yığmamız bu gün Türkiyəyə qarşı istənilən oyunu sərgiləyə biləcək?
- Bu rəqibi udmaq olar və udmaq lazımdır. Uşaqları bu görüşə ən yaxşı şəkildə kökləməliyik.
- Yığmamız elit raunda çıxa bilməsə necə olacaq?
- Tələsməyək. Biz ancaq uğur qazanmaq barədə düşünürük. Elit mərhələyə çıxmaq lazımdır.
- Bu gün Ukrayna yığmasının Bosniya və Herseqovinaya qalib gəlməsini arzulayacaqsınız?
- Bəli. Amma biz qələbə qazana bilməsək, bunun heç bir önəmi qalmayacaq.
- Doğma meydanda keçirilən oyunlarda kifayət qədər azarkeş dəstəyinin olmaması sizi narahat etmir?
- Əlbəttə, tribunalarda daha çox azarkeş görmək istəyərdim. Amma gələnlərə də ancaq sağ ol deyə bilərəm.
