Elvin Məmmədov: Moldova ilə oyuna nə qədər çox azarkeş gəlsə, bir o qədər yaxşıdır

Azərbaycan yığmasının və "Qarabağ"ın yarımmüdafiəçisi Elvin Məmmədovun azerisport.az saytına müsahibəsi

- Toplanış necə gedir?
- Hər şey normaldır. Məşqlərimiz öz qaydası ilə gedir. Çempionat oyunlarına görə yorğunluq olduğunu deməzdim. Çünki istirahət üçün də vaxtımız oldu.

- Yığmamızın növbəti rəqibi - Moldova ilə yoxlama oyunu barədə nə deyə bilərsiniz?
- Onların oyunlarına baxmışam. Məsələn, Rusiyaya qarşı AÇ-2016-nın seçmə mərhələ oyununu görmüşəm. Yaxşı komandadır. Bizim üçün isə hər bir rəqib güclü komanda hesab olunur.

- Bu komanda ilə görüş millimizin Bakı Olimpiya stadionunda ikinci oyunu olacaq. İlin son oyununda bu arenada ilk dəfə qələbə qazanmaq yaxşı olardı. Elə deyilmi?
- Buna çox ümid edirik. Əminəm ki, meydana çıxacaq futbolçular bunun üçün əlindən gələni edəcək.

- Yoxlama oyunu olduğunu nəzərə alsaq, böyük ehtimalla arenada boşluqlar çox olacaq. Çünki millinin oyunları zamanı 30 minlik Tofiq Bəhramov adına respublika stadionunu doldurmaq mümkün olmur, nəinki 65 minlik arenanı...
- Yoxlama oyunu olduğunu başa düşürük. Amma azarkeşlər komandamızı dəstəksiz qoymasalar, yaxşı olar. Nə qədər çox azarkeş gəlsə, bir o qədər yaxşıdır.

- Sizcə, 2014-cü ildə sizdən incik düşən azarkeşlərdə bu ilki çıxışınızla inam yarada bilmisiniz?
- Əlbəttə, ötən il bizim üçün çox uğursuz alındı. Amma bu ilə yaxşı başladıq. Bir neçə oyun ardıcıl məğlub olmadıq. Sadəcə, son iki görüşdə meydanı məğlub tərk etmişik. Onlardan da biri İtaliya ilə görüşə təsadüf edib. Bolqarıstanla oyunumuz isə qətiyyən alınmadı. Halbuki, belə məğlubiyyətlə üzləşməməli idik. Amma futbolda hər şey olur. İstənilən halda komandamızın inamı geri qaytardığını düşünürəm.

- Sizə elə gəlmir ki, Moldova ilə oyunda eksperimentdən daha çox nəticəyə önəm veriləcək?
- Qələbə qazansaq, buna ancaq sevinə bilərik. Amma təbii ki, səhvlər də mümkündür. Hər kəs səhv edə bilər.

- Ötən tsikldə sizi meydanda görə bilmədik. Bu oyunda meydana çıxmaq şansınız var?
- Ümid edirəm. Seçmə mərhələdə oynamadım. Amma bu oyunda şans qazansam, ondan maksimum yararlanmağa, özümü yaxşı tərəfdən göstərməyə çalışacağam.

- "Qarabağ"ın da heyətində Avroliqa oyunlarında az şans qazanırsınız. Səbəb nədir?
- Buna baş məşqçi qərar verir. Avroliqada oynamıramsa, deməli, günah özümdədir. Daha çox çalışmalı, məşq etməliyəm ki, mən də bütün oyunlarda meydana çıxmaq şansı qazanım.

- 12 turdan sonra çempionata liderlik etməyiniz yəqin ki, ürəyinizcədir...
- Hər şey normaldır. Lider olmaq xoşdur. Amma mənə elə gəlir ki, daha yaxşı çıxış edə bilərik. Bu mövsüm çox gərgin keçir. Ən azından ona görə ki, Avroliqada da mübarizə aparırıq. Bu, futbolçular üçün daha çox oyun təcrübəsi deməkdir.