Samir Əliyev: Neftçinin bəzi futbolçuları imkanlarından aşağı çıxış edir

"Neftçi"nin baş məşqçisi Samir Əliyevin azerisport.az saytına nüsahibəsi

- "Neftçi" heç də ondan gözlənilən oyunu göstərmir. Yəqin ki, siz də razı deyilsiniz...
- Komandanın oyunundan tək mən yox, "Neftçi"nin bütün azarkeşləri narazıdır. Ona görə də bu barədə çox danışmaq istəmirəm.

- "Neftçi"nin heyətində istedadlı gənclər, təcrübəli legionerlər cəmləşib. Elə isə uğursuz çıxışınızın səbəbi nədir?
- Bunun çoxlu səbəbi var. Amma komanda nəticə verə bilmirsə, deməli, səbəbkar baş məşqçidir.

- Ruslan Qurbanov "Rəvan"a məğlubiyyətdən sonra bildirdi ki, "Neftçi"də yüz faiz güc sərf etməyən futbolçular var. Siz onunla razısınız? Samir Əliyevin uğur qazanmasını istəməyən futbolçuların kimliyini bilirsiniz?
- Mən belə söhbətlərə inanmaq istəmirəm. Amma Ruslanla bir məsələdə razıyam ki, bəzi oyunçular öz imkanlarından aşağı çıxış edirlər. Mən də bunu başa düşə bilmirəm.

- Siz komandadan getmək istədiyinizi bir neçə dəfə açıqlamısınız. Sizi nə saxlayır?
- Biz bu məsələyə bir neçə gün sonra aydınlıq gətirəcəyik. Rəhbərliklə görüşdən sonra. Hər şey ola bilər.

- Növbəti turda sizi "Xəzər Lənkəran"la oyun gzləyir. Bu, sizin üçün sonuncu oyun ola bilər?
- Mən məğlubiyyət barədə düşünmürəm. Futbolda qələbə də qazanmaq olar, məğlub olmaq da. Amma uduzmağı da bacarmaq lazımdır. Mübarizə aparmaq, döyüşmək, kişi kimi oynamaq lazımdır.

- "Neftçi"də qalsanız, yəqin ki, yeni legionerlərin alınmasını istəyəcəksiniz...
- Komandada qalıb-qalmamağımdan asılı olmayaraq, heyəti gücləndirmək lazımdır. Əks halda "Neftçi" qara zolaqdan çıxa bilməyəcək, uğursuzluqlar davam edəcək.