Deni Qaysumov: Qarabağ və Qəbələ qrupdan çıxmaq şansını saxlayır
Azərbaycan yığmasının sabiq futbolçusu Deni Qaysumov "Qarabağ"la "Qəbələ"nin Avropa Liqasında qrupdan çıxmaq şansları barədə danışıb. Azerisport.az saytına açıqlamasında o, bunları söyləyib:
"Qarabağ" "Monako"ya qarşı çox yaxşı oynadı. Birinci hissədə komandamız rəqibini oyun planında xeyli üstələyirdi. Amma ikinci yarıda "Qarabağ" həmin oyunu təkrarlaya bilmədi və üstünlüyü "Monako"ya verdi. Qolu da ona görə buraxdılar. Amma ondan sonra "Qarabağ" yenidən üstünlüyə yiyələndi və rəqib qapısı qarşısında qol vəziyyətləri yaratmağa başladı. Prinsipcə, Qurban Qurbanovun komandası yenə çox maraqlı çıxışetdi. "Qəbələ"yə gəlincə, onlar üçün futbol ulduzlarından qurulmuş "Borussiya" ilə oyun demək olar ki, alınmadı. Komandamız sonadək mübarizə aparsa da, heç nəyə nail ola bilmədi. Hər şeyə rəğmən, "Qarabağ"la "Qəbələ" qrupdan çıxmaq şanslarını saxlayır. Amma bunun üçün onlar qalan son iki oyunda mütləq qələbə qazanmalıdırlar. Onlara uğurlar arzulayıram. İnanıram ki, uğur qazana biləcəklər".
