Şahin Diniyev: Moldova bizim dişimizə görə rəqibdir
"Kəpəz"in baş məşqçisi Şahin Diniyevin azerisport.az saytına müsahibəsi
- Gələn həftə Azərbaycan yığmasını Moldova ilə yoxlama oyunu gözləyir. Milliyə dəvət alanlar arasında sizin də komandadan iki futbolçu var - Tərlan Quliyev və Rəşad Eyyubov...
- Şübhəsiz ki, bu, məni sevindirir. Bütövlükdə, komandamızdan beş futbolçu müxtəlif yığmalara dəvət alıb. "Kəpəz"də çoxdan idi belə hal baş vermirdi. "Kəpəz"də çıxışedən futbolçuların milli komandalara dəvət olunması xoşdur. Fikrimcə, zaman keçdikcə, bu göstərici daha da artacaq.
- Rəqibin və oyunun statusunu nəzərə alsaq, komandanızın üzvləri Moldova ilə görüşə start heyətdə çıxa bilər?
- Fikrimcə, Moldova ilə necə oynamaq lazım olduğunu, hansı futbolçuların meydana çıxmasını Robert Prosineçki yaxşı bilir. Amma onun heyətdə eksperimentlərə əl atması mümkündür.
- Sizcə, ilin son oyunu üçün rəqib seçimimiz nə dərəcədə düzgündür?
- Moldova bizim dişimizə görə rəqibdir. Hesab edirəm ki, bu oyunda heyət və taktika ilə bağlı müəyyən eksperimentlər etmək olar. Amma yenə deyirəm ki, bunların hamısı Prosineçkinin qərarından asılıdır.
- Çempionatda növbəti fasilə yarandı. "Kəpəz" 12 günlük fasilədən necə yararlanacaq?
- Biz öz yolumuza davam edirik. Xoş məqamlar da var, mənfi məqamlar da. Komandamız hər görüşdə yaxşı futbol sərgiləməyə çalışır. Əsas odur ki, öz oyun üslubumuz var. Artıq ardıcıl altı oyundur uduzmuruq. Bunlar hamısı sevindirir. Amma bəzi oyunlarda qələbəni əldən verməmək də olardı. Məsələn, AZAL (1:1) və "Zirə" (2:2) ilə oyunlarda belə oldu. Hesab edirəm ki, bu oyunlarda biz rəqiblərimizlə müqayisədə 3 xala daha yaxın idik. Qol epizodlarını çox boşa veririk.
- Fasilədən sonra sizi son çempionla oyun gözləyir...
- "Qarabağ"la oyun öncəsi bizi daha çox narahat edən məqam4-5 futbolçumuzun yoxluğu narahat edir. Heyətdə dəyişiklik etmək üçün isə seçimimiz azdır. Dario Junior sıradan çıxıb, Bəxtiyar Soltanov cəzalı duruma düşüb, Kərim Diniyev hələ zədəsini sağaltmaqla məşğuldur. Budaq Nəsirovla Azad Kərimovun da zədəsi var. Amma meydana çıxanlar da meydanda maksimum güc qoyurlar. Qarşıda AZAL-la yoxlama oyunumuz var. Noyabrın 15-dən isə "Qarabağ"la oyunun hazırlığına başlayacağıq.
- Artıq qış fasiləsinə çox az qalıb. Artıq yanvarda hansı mövqelərə futbolçu alacağınızı götür-qoy etməyə başlamısınız?
- Transfer planlarımız, toplanışın harada keçirilməsi kimi məsələlər bu ilin sonunda hansı mövqedə qərarlaşmağımızdan asılı olacaq.
