Kaue: Belə davam etsə, hər şey Neftçi üçün daha pis nəticələnə bilər

"Neftçi"nin yarımmüdafiəçisi Kaue Topaz Premyer Liqasının 12-ci turunda "Rəvan"a qarşı keçirdikləri oyundan (2:3) sonra azerisport.az saytının suallarını cavablandırıb.

- Oyun barədə nə deyə bilərsiniz?
- Birinci hissə bizdə hər şey yaxşı alındı. Xeyli qol vəziyyəti yaratdıq, rəqibə qol vurmaq üçün xüsusi şans vermədik. Amma ikinci yarıda hər şey biz istəyən kimi getmədi. Fasilədən dərhal sonra yol verdiyimiz iki səhv nəticəsində məğlub duruma düşdük. Demək olar ki, oyun bizim üçün pis alındı.

- Azarkeşlər oyunun gedişində sizin ünvanınıza heç də xoş olmayan sözlər səsləndirirdilər...
- Mən onların nə dediyini başa düşmürdüm. İstənilən halda bunu probleme etmirəm. Mən öz işimi görürəm. Çıxışım onların xoşuna gəlmirsə, etiraz edə bilərlər. Futbolda bu, normal haldır.

- 12 oyunda cəmi 3 qələbə. "Neftçi" hara gedir?
- Belə davam etsə, daha pis olacaq. Nəyisə dəyişmək lazımdır. Ola bilsin ki, hətta oyun üslubumuzu da. Azarkeşlər yalnız bizim oyunumuzu görürlər. Onlar komandada nə baş verdiyini, məşqlərimizi görmürlər.

- Olar ki, bunlar barədə danışasınız?
- Mən nəsə pis hadisələrin yaşandığını demirəm. Onu demək istəyirəm ki, hər şeyin yaxşıya doğru dəyişməsi üçün əlimizdən gələni edirik, məşqlərdə çox çalışırıq. Amma məğlubiyyətlər komandaya pis təsir edir. Hərdən biz gecələri yata da bilmirik.

- Futbolçular məşqlərdə çalışıb, bəhrəsini görmürsə, belə çıxır ki, problem baş məşqçidədir?
- Bilmirəm. Bu, sizin fikrinizdir. Mən sadəcə, öz işimi görürəm. Baş məşqçi nə deyirsə, onu da edirəm.

- Növbəti turda sizi "Xəzər Lənkəran"la oyun gözləyir...
- Bizim özümüzə gəlməyimiz, yaxşı hazırlaşmağımız üçün vaxtımız var. Səhvlərimizdən nəticə çıxarmalı və qarşıdakı oyunlarda uğur qazanmalıyıq.