Mahir Mədətov: Millimizin uğur qazanması üçün əlimdən gələni edəcəyəm
Azərbaycanın U-19 yığmasının və "Qarabağ"ın yarımmüdafiəçisi Mahir Mədətov AÇ-2017-nin seçmə mərhələsi çərçivəsində Ukraynaya qarşı bu gün keçirəcəkləri oyun öncəsi fikirlərini bölüşüb. Azerisport.az saytına açıqlamasında o, öncə bunları söyləyib:
"Ukrayna ilə oyuna hazırıq. Artıq çoxdandır bu kollektivlə birgə oynayırıq. Bircə baş məşqçimiz dəyişilib. Amma o da öz oyun fəlsəfəsini bizə aşılaya bilib. Hər şey normaldır. Rəqibin heyətində ucaboy futbolçular var. Onların yaxşı fiziki formada olduğunu əminliklə demək olar. Lakin hansısa xüsusi özəlliklərinin olduğunu deməzdim".
Mədətov U-19-un Premyer Liqamızda meydana çıxan tək-tük futbolçusundan biridir. Bu baxımdan ondan Ukrayna ilə oyunun taleyini həll etməsini gözləmək olarmı? Bu sualı Mahir belə cavablandırıb: "Futbol komanda oyunudur. Məşqçilərim uşaqlıqdan mənə bir şeyi deyiblər ki, istedadlı futbolçu komandasına çox kömək edə bilər. Amma çempion olmaq komanda oyunundan asılıdır. Yığmamızın da uğur qazanması üçün əlimdən gələni edəcəyəm. İnanıram ki, digər uşaqlar da belə düşünürlər".
"Bizim üçün rəqibin kimliyi heç vaxt önəm kəsb etməyib. Seçmə mərhələnin bütün oyunlarına qələbə üçün çıxacağıq. Allah eləsin ki, müsbət nəticəyə nail olaq. Evdə oynayacağıq. Heç nədən qorxmamalıyıq. Belə bir yaşda hətta Braziliyaya da qarşı oynamağa hazırıq. Əsas oyuna yaxşı hazırlaşmaqdır. Matça pis hazırlaşan sonda meydanı məğlub tərk edir".
