Kazım Birkan: Bob Bredli mənim oyunumu bəyənir
Azərbaycanın U-19 yığma komandasının yarımmüdafiəçisi Kazım Birkan AÇ-2017-nin seçmə mərhələsi çərçivəsində Ukraynaya qarşı keçiriləcək oyun öncəsi azerisport.az saytının suallarını cavablandırıb.
- Seçmə mərhələyə necə hazırlaşmısınız?
- Hər şey çox yaxşı alındı. Biz həm taktiki, həm də fiziki baxımdan yaxşı hazırlaşmışıq. Komandada ab-hava da çox yaxşıdır.
- Seçmə mərhələdə Ukrayna, Türkiyə, Bosniya və Herseqovina ilə qarşılaşacaqsınız. Növbəti mərhələyə çıxmaq şansınız var?
- Əlbəttə, şans var. Amma qrupumuz çox çətindir. İstənilən halda gücümüzə inanırıq və sonadək mübarizə aparacağıq. Allah eləsin ki, bu mərhələni keçək. İntizamlı oynasaq, buna nail ola bilərik. Hər şey özümüzdən asılıdır. Hədəfimiz hər üç oyunda qələbə qazanmaqdır. Komandamız ən yaxşısına layiqdir.
- Norveç "Stabek"ində işləriniz necə gedir?
- Hər şey əladır. Məni A komandasına keçiriblər. Sadəcə, hələ 18 yaşım tamam olmayıb. 18 yaşım tamam olan kimi klubla rəsmi müqavilə imzalayacağam. "Stabek"də məni sevirlər və dəstəkləyirlər.
- "Stabek"in baş məşqçisi Bob Bredli çox tanınmış mütəxəssisdir...
- Məni komandaya məhz o dəvət edib. Oyunum onun xoşuna gəlir.
- Bəs o, sərgilədiyiniz oyunu necə qiymətləndirir?
- Baş məşqçi mənim oyunumla bağlı yaxşı fikirdədir. Haqqımda çox yaxşı futbolçu olduğumu deyib. İntizamlı olmağım da onun xoşuna gəlir. Norveçdə topla oynamağı sevən az futbolçu var. Bredli də məndə məhz bu keyfiyyəti bəyənir. Topla oyamağı sevirəm. O, məni yığma komandaya buraxdı və uğurlar arzuladı.
