Ansi Aqolli: Hələ qrupdan çıxmaq şansımızı itirməmişik
"Qarabağ"ın müdafiəçisi Ansi Aqolli Topaz Premyer Liqasının 12-ci turu çərçivəsində "Xəzər Lənkəran"a qarşı keçirəcəkləri səfər oyunu öncəsi azerisport.az saytının suallarını cavablandırıb.
- "Xəzər Lənkəran"ın zəif heyətlə, qeyri-sabit çıxış etdiyini nəzərə alsaq, bu rəqibə asanlıqla qalib gələcəyinizi gözləmək olar?
- Xeyr, çətin oyun olacağını düşünürəm. "Xəzər Lənkəran" doğma meydanda yaxşı oynayır. Həm də onlar bizə qarşı motivasiyalı oynayacaqlar. Lənkəranda oynamaq bütün komandalara çətindir. "Qarabağ"a da çətin olacaq. Amma biz qələbə qazanıb, turnir cədvəlindəki liderliyimizi möhkəmləndirmək istəyirik.
- "Monako" ilə heç-heçəni (1:1) necə şərh edə bilərsiniz?
- Fikrimcə, biz yaxşı oynadıq. Birinci hissədə əla çıxış etdik. Bunun da sayəsində qol vurduq. Amma "Monako"ya qarşı oynadığımızı unutmamalıyıq. Bu komandada yüksək səviyyəli futbolçular çıxış edir. İkinci hissədə qol buraxmağımız, qələbəni əldən verməyimiz də təsadüfi deyildi.
- Samuel Armenterosun qolundan sonra qələbə qazanacağınıza inanırdınız?
- Bəli, qələbə qazanacağımızı düşünürdüm. Buna çox inanırdım. Çünki komandamız yaxşı futbol göstərirdi. Monakoda da yaxşı çıxış etmişdik. Ona görə də Bakıdakı görüşdən qalib ayrılacağımıza inam böyük idi.
- Reynaldosuz oynamaq "Qarabağ"a çətindir?
- O, komandamız üçün vacib oyunçudur. Amma digər futbolçular da "Qarabağ" fayda vermək üçün əllərindən gələni edirlər. Misal kimi Armenterosu göstərə bilərəm. Reynaldoya da mümkün qədər tez sağalmağı arzulayıram.
- "Qarabağ"ın qrupdan çıxmaq şansları barədə nə düşünürsünüz?
- Əlbəttə, "Monako" ilə Bakıdakı oyunda 3 xal qazansaydıq, daha yaxşı olardı. Amma məyus olmağa dəyməz. Çünki hələ qrupdan çıxmaq şansımızı itirməmişik. Bu şansı əldən verməməyə çalışacağıq. Bizi daha iki oyun gözləyir. Əlimizdən gələni edəcəyik ki, bu görüşlərdə maksimum xal toplayaq.
- "Tottenhem"ə qarşı keçirəcəyiniz növbəti oyunda qələbə qazanmaq şansınız nə dərəcədə çoxdur?
- Futbolda mümkünsüz heç nə yoxdur. "Tottenhem"ə qarşı həddən artıq diqqətli və böyük istəklə oynamalıyıq. Hədəf uğurlu nəticəyə imza atmaqdır.
