David Petrkeviç: PAOK və Krasnodara qalib gəlmək istəyirik
"Qəbələ"nin qapıçısı David Petrkeviç Topaz Premyer Liqasının 12-ci turunun "İnter"lə oyunu öncəsi azerisport.az saytının suallarını cavablandırıb.
- "Borussiya" (Dortmund, Almaniya) ilə oyunda dörd qoldan ikisini yaxın küncdən buraxdınız. Həmin zərbələri dəf edə bilərdiniz?
- Henrix Mxitaryanın zərbəsi zamanı topu çıxarmaq mümkünsüz idi. Amma Marko Roysun qolunu dəf etmək olardı. Bəxt çatmadı.
- Bəzi epizodlarda siz topu iki cəhddə dəf edirdiniz. Bu, sizin oyun təcrünizin olmamasından irəli gəlir?
- Sizinlə razılaşmıram. Yaxşı matç keçirdiyimi düşünürəm. Komandanı çoxlu qol epizodu zamanı xilas etdim. "Borussiya"nın meydanında çıxış etmək çox çətin idi.
- "Qəbələ"nin əsas qapıçısı Dmitri Bezotosnı zədəli olmasaydı, komandanız Dortmundda neçə qol buraxardı?
- (gülür) Bunu təxmin etmək çətindir.
- Siz "Borussiya" ilə 10 dəfə qarşılaşsanız, onların hamısında uduzarsınız?
- Bu komanda tam fərqli səviyyədədir. Onlar ümumiyyətlə bu turniri qazanacaq gücdədirlər. Bir müddət öncə Çempionlar Liqasının finalında oynamaları da çox şeydən xəbər verir. Bizə gəlincə, qrupdan çıxmaq şanslarımız heçə ensə də, buna görə iddiamızı azaltmaq fikrimiz yoxdur. PAOK və "Krasnodar"a qalib gəlmək istəyirik.
- Amma qarşıda hələ "İnter"lə çempionat oyunu var...
- Qələbə qazanmaq lazımdır.
- Komandanız son üç turda özündən zəif rəqiblərə qalib gələ bilmir...
- Bizim bu baxımdan hansısa sualımız yoxdur. Oyuna köklənmək lazımdır. Fikrimcə, qalib gəlməyi bacaracağıq.
- Amma son uğursuzluqlar "Qarabağ"ın sizdən aralanmasına şərait yaratdı. Bu, ciddi fərqdir?
- Xeyr. Qarşıda çox oyun var. Biz hələ "Qarabağ"la daha üç oyun keçirməliyik. Bu, 9 xal deməkdir. Bu o deməkdir ki, biz onlardan hətta 4 xal önə də keçə bilərik.
- Legioner limitinə görə, "İnter"lə oyunda sizin Andrey Popoviçlə əvəzlənməyiniz mümkündür?
- Bu sual baş məşqçiyə ünvanlanmalıdır.
