Dani Kintana: Ümid edirəm ki, qazon Tottenhemlə oyunda daha yaxşı olacaq

"Qarabağ"ın yarımmüdafiəçisi Dani Kintana Avropa Liqasının qrup mərhələsi çərçivəsində Fransanın "Monako" klubuna qarşı keçirdikləri oyundan (1:1) sonra azerisport.az saytının suallarını cavablandırıb.

- Oyun barədə nə deyə bilərsiniz?
- Biz qələbəyə layiq idik. Amma elə alındı ki, "Monako"dan cəmi bir xal ala bildik. Rəqibin bəxti çox gətirdi. Xüsusilə də buraxdığımız qol epizodunda. Hansı ki, həmin epizodda bizim qətiyyən bəxtimiz gətirmədi. Ondan sonra yenə qol vurmaq üçün çox çalışdıq. Lakin alınmadı. Nəticədə, 1:1 hesablı bərabərliyə razılaşmalı olduq. Buna baxmayaraq, qrupdan çıxmaq üçün mübarizəmizi davam etdiririk. Bunun üçün qarşıdakı oyunlardan qalib ayrılmağımız lazımdır.

- "Qarabağ"ın "Monako"ya qarşı səfərdəkindən daha yaxşı oynadığını demək olar?
- Bəli, yaxşı oynadıq. Burada qazon çox ağırdır. Oyundan öncə mənim kiçik zədəm var idi. Ona görə bir həftə oynaya, aktiv məşq edə bilməmişdim.

- Deməli, qazon bu dəfə də sizə mane oldu?
- Biz öz futbolumuzu oynamağa çalışdıq. Əvvəlki oyunlarla müqayisədə təbii ki, meydançanın vəziyyəti yaxşı idi. Məsələn, "Anderlext"lə oyundan. Amma mənə elə gəlir ki, qazon rəqibdən daha çox bizim üçün ağır oldu. Ümid edirəm ki, "Tottenhem"lə ev oyunumuzda qazon bundan da yaxşı olacaq.

- Hamının sizdən qələbə gözlədiyini nəzərə alsaq, üzərinizdə təzyiq hiss edirdiniz?
- Bəli, əlbəttə, təzyiq hiss edirdik. Eyni zamanda başa düşürdük ki, qələbə qazanmaq heç də asan məsələ deyil.

- Bundan sonra qrupdan çıxmaq şanslarınızı necə dəyərləndirə bilərsiniz?
- Şansımız hələ də qalır. Sonadək mübarizəmizi davam etdirəcəyik.