Fariz Nəcəfov: Roman Qriqorçukla uzun müddətli müqavilə bağlamaq fikrimiz var
"Qəbələ"nin vitse-prezidenti Fariz Nəcəfov Avropa Liqasının qrup mərhələsinin dördüncü turu çərçivəsində Almaniyanın "Borussiya" (Dortmund) klubuna qarşı keçirdikləri oyundan (0:4) sonra azerisport.az saytının suallarını cavablandırıb.
- Oyunla bağlı nə deyə bilərsiniz?
- Oyunun çətin olacağını bilirdik. Baxmayaraq ki, bu oyunda müsbət nəticəyə ümidli idik. Üstəlik, səfərdə oynayırdıq. Rəqib də çox güclü idi.
- Komandanız son dövrlər uğursuz çıxış edir. Bununla bağlı klubdaxili toplantı keçirməmisiniz?
- Mən oyunun analizi prosesində iştirak etmişəm. Orada heç kim günahlandırılmadı. Fikrimcə, növbəti oyunlarda hər şey yaxşı olacaq.
- Komandanın son uğursuzluqlarını Roman Qriqorçukun Ukrayna yığmasına mümkün gedişi ilə bağlı yayılan xəbərlərlə bağlayanlar var...
- Bu, bir təsadüfdür və müzakirə mövzusu ola bilməz. Hələ bundan öncə Qriqorçukla söhbətimiz olmuşdu və mənə bildirmişdi ki, məşqçilərin niyə yığmanı çalışdırmağa can atdığını başa düşmür. Potensialı olan məşqçi yığmada çalışmağa can atmamalıdır. İldə cəmi bir neçə oyun keçirmək əksər məşqçilər üçün darıxdırıcı olur. Üstəlik, Qriqorçuka heç bir təklif də gəlməyib. Komandanın çıxışına gəlincə, yaxşı oynayırıq. Sadəcə, bəxtimiz gətirmir.
- Ola bilər ki, bütün bu söhbətlərə son qoymaq üçün onunla uzunmüddətli müqavilə imzalayasınız?
- Bizim belə bir ideyamız var. Amma bu barədə hələ aramızda söhbət olmayıb.
- Avroliqa oyunlarında meydanda azərbycanlı futbolçuların çox az görünməsi sizi narahat etmir?
- Biz də istərdik ki, yerli futbolçularımızın sayı çox olsun. Amma heyəti baş məşqçi müəyyənləşdirir və biz ona bu məsələdə güvənirik. Onun işinə qarışa bilmərik. Meydana ən yaxşılar çıxırlar. Dünən akademiyamızın yetirməsi olan Elvin Camalovu meydanda görməklə fəxr etdim.
- Vüqar Nadirov qışda "Qəbələ"ni tərk edəcək?
- Bu məsələləri baş məşqçi həll edir. Bu barədə də onunla söhbətimiz olmayıb. İlin sonunda müzakirə edəcəyik. Eyni sözləri digər futbolçulara da aid etmək olar.
- Vaxtilə "Borussiya" ilə "Qarabağ" arasında keçirilmiş oyunda tanınmayan DQR-in bayrağı açılmışdı. Sizinlə oyunda isə ancaq erməni bayraqları görmək mümkün idi. Siz bu barədə "Borussiya" rəsmiləri ilə söhbət etmişdiniz?
- Biz təkcə bu barədə yox, çox şey haqda söhbət etmişdik. Fikrimcə, Mxitaryanın bizə qol vurmasını şişirtmək lazım deyil. Bizim ermənilərlə əsas mübarizəmiz Qarabağdadır. Ötən gün ancaq oyunu düşünürdük. Bütün stadion erməni bayraqları ilə dolu olsaydı da, oyuna münasibətimizdə dəyişiklik olmayacaqdı.
