Henrix Mxitaryan: Qəbələ yaxşı komandadır, onlara uğurlar arzulayıram

Almaniyanın "Borussiya" (Dortmund) klubunun futbolçusu Henrix Mxitaryan Avropa Liqasının qrup mərhələsi çərçivəsində "Qəbələ"yə qarşı keçirdikləri oyunu şərh edib. Azerisport.az xəbər verir ki, o, komandasının 4:0 hesablı qələbəsi ilə bağlı bunları söyləyib:

"İlk qola qədər bizim üçün hər şey çətin idi. Amma hesabı açdıqdan sonra rəqib komandanın müdafiəsində boşluqlar yaranmağa başladı. Ondan sonra biz daha çox hücum etməyə başladıq. İkinci qoldan sonra bizə oynamaq daha rahat oldu. Komandamız yaxşı oynadı, komanda yoldaşlarımı qələbə münasibətilə təbrik edirəm. "Qəbələ" də yaxşı komandadır. Rəqib komandanın baş məşqçisi ilə tanışam. Aleksey Qayla da birgə oynamışıq. Sergey Zenyovu, Dmitri Bezotosnını, Aleksey Antonovu, Vitali Vernidubu tanıyıram. Klubunuza uğurlar arzulayıram.

Bakıya gəlməməyimə gəlincə, mən bunu istəyirdim. Amma təhlükəsizlik məsələlərinə görə, Dortmundda qalmağıma qərar verildi".

Bu zaman ona vaxtilə ölkəmizdə keçirilmiş müxtəlif turnirlərdə erməni idmançıların problemsiz iştirakı barədə məlumat verilsə də, o, bunları qeyd edib: "Güləşçilər, şahmatçılar gəliblər. Amma futbol tamamilə başqadır. Mən ora gələcəyim halda nə baş verəcəyini deyə bilmərəm".

Erməni futbolçu ölkəsinin milli bayraqları ilə birgə onu dəstəkləməyə gəlmiş azarkeşlərlə də bağlı fikirlərini bölüşüb: "Burada mənim həmyerlilərim çoxdur. Onlar "Borusiya"nın oyunlarına gəirlər. Bu oyunu izləmələrinin Azərbaycan klubuna qarşı oynamağımızla bağlı olduğunu düşünmək lazım deyil. Onlar mənə görə gəlmişdilər, Azərbaycan klubuna qarşı azarkeşlik etməyə yox"

"Vurduğum qola gəlincə, hələ oyundan öncə də demişdim ki, bu görüş mənim üçün xüsusi əhəmiyyət daşımır. Amma vurduğum qo xoşuma gəldi. Burada heç bir prinsipiallıq yoxdur".