Rikardinyo: Dortmunda böyük ümidlərlə gəlmişik

"Qəbələ"nin müdafiəçisi Rikardinyo Avropa Liqasının qrup mərhələsi çərçivəsində Almaniyanın "Borussiya" (Dortmund) klubuna qarşı keçiriləcək oyun öncəsi fikirlərini bölüşüb. Azerisport.az saytına açıqlamasında o, bunları söyləyib:

"Rəqibin gücü hər kəsə bəllidir. "Borussiya"nın heyətində güclü futbolçular çıxış edir. Amma buna baxmayaraq, biz Dortmunda böyük ümidlərlə gəlmişik. Müsbət nəticə qazanmaq istəyirik. Futbolda hər şey mümkündür. Tez-tez sensasiyalar qeydə alınır. Biz də "Borussiya"ya qalib gələ bilərik. Sadəcə, bunun üçün 90 dəqiqə səhvsiz oynamalıyıq. Şəxsən məni bu oyunda heç-heçə də qane edərdi. Rəqibin heyətində kimisə ayrıca qeyd etmək istəməzdim. "Borussiya"nın heyəti Henrix Mxitaryansız da güclüdür. Pyer-Emerik Obameyanqa gəlincə, o, güclü futbolçudur. Lakin onun uğurlarında, bu qədər qol vurmasında komanda yoldaşlarının da böyük xidməti var. Biz diqqətli oynamalı və rəqib futbolçuların ona qol ötürmələri verməsinə imkan verməməliyik. Dmitri Bezotosnı güclü qapıçıdır. O, bu oyunda bizə kömək edə bilməyəcək. Amma bizim daha iki güclü qapıçımız var. Bu, sadəcə, söz deyil. Fikrimcə, "Qəbələ"nin qapıçı baxımından problemi olmayacaq".