Rəşad Sadiqov: Qəbələ Dortmundda Neftçinin Milandakı uğurunu təkrarlaya bilər
"Qəbələ"nin yarımmüdafiəçisi Rəşad Sadiqov Avropa Liqasının qrup mərhələsinin dördüncü turu çərçivəsində Almaniyanın "Borussiya" klubuna qarşı keçirəcəkləri səfər oyunu öncəsi fikirlərini bölüşüb. Azerisport.az xəbər verir ki, təcrübəli futbolçu açıqlamasında vaxtilə "Qarabağ"ın heyətində Dortmund təmsilçisinə qarşı oyunu da xatırlayıb:
"Həmin oyunu artıq unutmuşam. Çünki həmin oyun çoxdan olub. Məğlub olmağımıza baxmayaraq, biz onda yaxşı oynamışdıq. Yaxşı mübarizə apardıq. "Borussiya"nın azarkeşlərinin həmin oyundakı davranışlarını hələ də xoş xatirələrlə yada salıram. Burada futbol oynamaq çox xoşdur".
Sadiqov həmçinin "Neftçi"nin heyətində Milan "İnter"inə qarşı keçirdiyi oyundan da danışıb: "Biz həmin oyundakı nəticəni təkrarlaya bilərik. Buna inamımız da var. Hamımız uğur qazanacağımıza inanırıq. "Qəbələ"nin hələ qrupda qələbəsi yoxur. Amma olacaq. İstək olandan sonra "Neftçi"nin Milanda 2:2 hesablı heç-heçəyə imza atdığı kimi, Dortmundda da uğurlu nəticə qazanmaq mümkündür".
