Dodo: XL ilə oyunda olduğu kimi, Borussiyaya da 8-ci saniyədə qol vurmaq istərdim

"Qəbələ"nin yarımmüdafiəçisi Dodo Avropa Liqasının qrup mərhələsinin dördüncü turu çərçivəsində Almaniyanın "Borussiya" (Dortmund) klubuna qarşı keçirəcəkləri səfər oyunu öncəsi azerisport.az saytının suallarını cavablandırıb.

- Qarşıdakı oyundan nə gözləyirsiniz?
- Meydana çıxan hər bir futbolçu qələbə qazanmaq istəyir. Eləcə də biz bu oyundan qalib ayrılmaq istəyirik. Aydın məsələdir ki, rəqib çox güclüdür. Almanlara qarşı xüsusilə səfərdə oynamaq çox çətin olacaq. Çünki "Borussiya"nın avrokuboklarda zəngin təcrübəsi var. Amma bütün çətinliklərə baxmayaraq, qələbə qazanmağı çox istəyirik.

- Bakıdakı görüşün sonunda bu komandaya qol vurmağı bacardınız. Dortmundda da qol vuracağınıza, komandanıza qələbə qazandıracağınıza inanırsınız?
- Əlbəttə, imkanım olsa, elə birinci dəqiqədə qol vurmağa çalışacağam. Amma hər şey imkandan asılıdır. Məsələn, "Borussiya"nı da "Xəzər Lənkəran"la oyunda olduğu kimi, 8-ci saniyədə cəzalandırmaq istərdim. Erkən qol vursaq, uğur qazanmaq imkanımız da artmış olar.

- Səfərdə hücum futbolu oynayacaqsınız, ya müdafiə?
- Son iki oyunu buraxmışam. Baş məşqçimiz rəqibi analiz edib. Amma hələ taktika seçməmişik. Hələ bunun üçün vaxtımız var.

- Komandanızın son turlardakı uğursuz çıxışı oyununuza təsir göstərə bilər?
- Düşünmürəm ki, bu, hansısa psixoloji gərginliyə səbəb olsun. Futbolda qələbələr də olur, məğlubiyyətlər də. Amma təbii ki, uduzmaq elə də yaxşı hal deyil.

- Dmitri Bezotosnının yoxluğu nə dərəcədə təsirini göstərəcək?
- Bunun bizə hansısa çətinlik yaradacağını düşünmürəm. Çünki bizim başqa qapıçımız da var. David Petrkeviçə inanıram.