Vladimir Miçoviç: Neftçini 6-cı pillədə görmək heç də xoş deyil
"Neftçi"nin sabiq qapıçısı Vladimir Miçoviçin azerisport.az saytına müsahibəsi
- Hazırda heç bir yerdə işləmirsiniz. Azərbaycandan, digər ölkələrdən heç bir təklif yoxdur?
- Təkliflər var. Amma mən düzgün qərar qəbul etmək istəyirəm, ona görə tələsmirəm.
- Sirr deyilsə, hansı klublardan təklif var?
- Mən sirri açmamağa üstünlük verirəm. Çünki hələ heç kimə dəqiq cavab verməmişəm. Gəlin bir qədərdə gözləyək, o zaman klubun adını açıqlayacağam. Mən özüm Azərbaycanda çalışmaq istəyərdim. 10 ildir Bakıda çalışırdım. Bu şəhər artıq mənim üçün çox doğmalaşıb. Ən gözəl illərimi məhz Bakıda keçirmişəm.
- "Neftçi"nin futbol akademiyasını niyə tərk etdiniz?
- Bu, kluba yeni rəhbərliyin gəlişindən sonra baş verdi. Onlar mənə yeni müqavilə təklif etmədilər. Ona görə də getdim.
- Sizcə, "Neftçi" niyə Premyer Liqada uğursuz çıxış edir?
- Çempionatla, "Neftçi"nin oyunları ilə maraqlanıram. Komandanı 6-cı pillədə görmək heç də xoş deyil. Uğursuz çıxışın dəqiq səbəbini deyə bilmərəm. Amma işlərin qaydasında getmədiyi görünür. Klub rəhbərliyi daha çox gənclərə şans verir. Lakin bu, uzunmüddətli prosesdir.
- Sizcə, Samir Əliyev baş məşqçi postunda çox qalacaq?
- Samir çox yaxşı insandır. Futbolçu kimi yüksək səviyyəli oyun sərgiləyirdi. Məşqçi kimi də böyük gələcəyi var. Klub rəhbərliyi ona şans veribsə, vaxt da verməlidir. Onun 2-3 il bu postda qalması lazımdır.
- "Neftçi"də "ikinci Miçoviç"i görürsünüz?
- Hamıya hörmətim var, amma təəssüf ki, "Neftçi"də "ikinci Miçoviç"i görmürəm. Fikrimcə, o, hələ uzun müddət olmayacaq. Yaxşı qapıçı tapmaq həmişə çətindir. Mənə elə gəlir ki, Azərbaycanda qapıçıların səviyyəsi aşağı enib. Sadəcə, "Qarabağ"ın qapıçısı İbrahim Şehiç öz səviyyəsini qoruyur.
- Bəs çempionatın səviyyəsi barədə nə deyə bilərsiniz?
- "Qarabağ"la "Qəbələ" çempionatın səviyyəsini qaldırıb. Amma digər klublarda səviyyə aşağı düşüb. Əvvəllər 5-6 komanda bərabər səviyyədə çıxış edirdi. İndi o da yoxdur.
- "Qarabağ"la "Qəbələ"nin Avropa Liqasındakı şansları barədə nə düşünürsünüz?
- "Qarabağ"ın qrupdan çıxmaq şansı daha çoxdur, nəinki "Qəbələ"nin. Amma bu iki komandanı istənilən halda qrup mərhələsində çıxış etdiklərinə görə təbrik etmək istərdim. Bu, Azərbaycan futbolu üçün heç də kiçik hadisə deyil.
