Zenyov: Qrupdan çıxmaq şansımız olduğuna görə Dortmundda sonadək mübarizə aparacağıq
"Qəbələ"nin hücumçusu Sergey Zenyov Avropa Liqasının qrup mərhələsinin dördüncü turu çərçivəsində Almaniyanın "Borussiya" (Dortmund) klubuna qarşı keçirəcəkləri səfər oyunu öncəsi azerisport.az saytının suallarını cavablandırıb.
- "Borussiya" ilə səfər oyunundan nə gözləyirsiniz?
- Əlbəttə, çox çətin oyun olacaq. "Borussiya" son dövrlər çox yaxşı oynayır. Bunu onların Bundesliqadakı çıxışında da görmək mümkündür. Üstəlik, onlarla səfərdə oynayacağıq. Ona görə də rəqibin böyük azarkeş dəstəyi də olacaq. Dortmundda oynamaq isə heç bir komandaya asan olmur.
- Artıq hər iki komanda bir-birini yaxşı tanıyır. Bunu sizin üçün müəyyən üstünlük saymaq olar?
- Mən buna ümid etmək istərdim. Amma asan olmayacağını bilirəm (gülür). "Borussiya" bizə qarşı Bakıdakı oyundan sonra yaxşı forma yığıb.
- "Qəbələ"nin Dortmundda qələbə qazanacağına çox az adam inanır. Siz sürpriz edəcəyinizə inanırsınız?
- Qələbəyə inanmasaydıq, meydana çıxmazdıq. Sən uduzacağını düşünürsənsə, ən yaxşısı meydana çıxmamaqdır.
- Bu rəqiblə Bakıdakı oyunda sizə nə çatmadı?
- Bizim matçın əvvəlində yaxşı qol vəziyyətlərimiz oldu. Amma onlardan istifadə edə bilmədik.
- Həmin epizodlardan birində də siz Dodoya ötürmə etdiniz. İndi həmin ötürməni etdiyinizə görə təəssüf hissi keçirmirsiniz?
- Çox təəssüflənirəm. Düzünü deyim ki, mən onun ofsayda düşəcəyini gözləmirdim. Eyni zamanda düşünmək üçün də həmin anda çox vaxtım yox idi.
- Dortmundda da oxşar epizod olsa, hansı qərarı verəcəksiniz?
- Yüz faiz zərbə vuracağam (gülür).
- Ümumiyyətlə, qol vəziyyəti yarada biləcəksiniz?
- Çalışacağıq. İstənilən oyunda qol vəziyyətləri olur.
- Dortmundda "Qəbələ"yə qarşı Henrix Mxitaryan da oynayacaq. Bu, əlavə təzyiqə səbəb olmayacaq ki?
- Mən bu barədə danışmaq istəmirəm. Mxitaryan yaxşı futbolçudur.
- "Borussiya" ilə oyun sizin qrupdan çıxmaq yolunda son şansınız da ola bilər...
- Nə qədər ki, şans var, sonadək mübarizəmizi davam etdirəcəyik.
- "Qəbələ"nin Premyer Liqanın son üç turunda qələbə qazana bilməməsinin səbəbi nədir?
- Çox gərgin qrafiklə oynayırıq. Amma növbəti oyunlarda uğursuz gedişata son qoymağa çalışacağıq. Ümid edirəm ki, hər şeyi normallaşdıra biləcəyik. Üstəlik, istirahət üçün də müəyyən vaxtımız olacaq.
