Nika Kvekveskiri: Qəbələnin Kəpəzə məğlubiyyəti yox, ardıcıl üç oyunda xal itirməsi gözlənilməzdir

"İnter"in yarımmüdafiəçisi Nika Kvekveskiri Topz Premyer Liqasının 11-ci turu çərçivəsində "Zirə"yə qarşı keçirdikləri oyunla (0:0) bağlı fikirlərini bölüşüb. Azerisport.az saytına açıqlamasında o, öncə bunları söyləyib:

"Biz pis oynamadıq. Gərgin oyun alındı. Nə "İnter", nə də "Zirə" uduzmaq istəyirdi. Ona görə də hər iki komanda diqqətli oynayırdı. Müdafiədə səhv etmək olmazdı. Bununla yanaşı 2-3 real qol vəziyyətimiz də oldu. Təəssüf ki, onlardan yararlana bilmədik".

Kvekveskiri növbəti turda qarşılaşacaqları "Qəbələ" ilə oyundan da söz açıb: "Rəqibimiz bizimlə oyuna Avropa Liqasının qrup mərhələsi çərçivəsində Almaniyanın "Borussiya" (Dortmund) klubu ilə çətin səfər matçından sonra çıxacaq. Bizdə isə məlum maliyyə problemləri var. Üstəlik, əsas heyətin 3-4 futbolçusu komandamıza kömək edə bilmir. Belə vəziyyətin kimin xeyrinə olduğunu demək çətindir. Hər kəsin bununla bağlı öz fikri var. Şəxsən mən, "Qəbələ"nin bizimlə oyuna yorğun çıxacağını düşünmürəm. Bizim maliyyə durumumuza gəlincə, bu haqda çox danışmaq istəmirəm. Hər şeyin yaxşı olacağına söz veriblər. Gözləyirik. Ümid edirəm ki, "İnter"in maliyyə durumu normallaşacaq və biz ancaq futbol barədə düşünəcəyik".

Gürcü yarımmüdafiəçi "Qəbələ"nin son turda "Kəpəz"ə məğlubiyyətindən (1:2) də danışıb: "Düzünü deyim ki, "Kəpəz"in bu qələbəsi mənim üçün gözlənilməz olmadı. Sadəcə, "Qəbələ"nin ardıcıl üç oyunda xal itirəcəyini gözləmirdim. Bax bu, əsl gözlənilməzlikdir".