David Petrkeviç: Qorxmaq lazım deyil, sadəcə, Borussiyaya çox qol vurmağa imkan verməməliyik
"Qəbələ"nin qapıçısı David Petrkeviç Topaz Premyer Liqasının 11-ci turu çərçivəsində "Kəpəz"ə qarşı keçirdikləri oyundan (1:2) sonra azerisport.az saytının suallarını cavablandırıb.
- "Qəbələ"də nə baş verir?
- Demək çətindir. "Kəpəz"ə qalib gəlməli idik. Amma əks-hücumda qol buraxıb, özümüz məğlub olduq. Rəqibimiz əks-hücumda yaxşı oynadı. Bizə isə "İnter"lə oyunadək bütün problemləri yoluna qoymaq qalır.
- Komandanızın uğursuz nəticələri baş məşqçi Roman Qriqorçukun Ukrayna yığmasına mümkün gedişi barədə yayılan xəbərlərlə üst-üstə düşdü...
- Düzdür, elə oldu. Amma bunda başqa heç nə axtarmağa dəyməz. Düşünmürəm ki, komandamız məhz bu xəbərlərə görə belə uğursuz çıxış edir.
- Dmitri Bezotosnı zədə aldığından qarşıdakı iki həftə ərzində siz oynamalı olacaqsınız. Hazırsınız?
- Təəssüf ki, Dima zədə aldı. O, yaxşı formada idi. Amma futbolçu həyatı belədir. Zədədən yan qaçmaq olmur. Mənə gəlincə, hazıram. Lakin Bezotosnının yoxluğunda onu kimin əvəz edəcəyini bilmirəm. Baş məşqçinin qərarından asılıdır.
- "Kəpəz"lə oyunda onu siz əvəzlədinizsə, növbəti oyunlarda da belə olacağını proqnozlaşdırmaq çətin deyil. Qarşıda isə sizi Avropa Liqasının qrup mərhələsi çərçivəsində Almaniyanın "Borussiya" (Dortmund) klubu ilə oyun gözləyir...
- Bizi çox çətin səfər oyunu gözləyir. "Borussiya" indi yaxşı formadadır. Bizə çox az adam inanır. Amma hər şey ola bilər. Biz Dortmunda müsbət nəticə üçün gedirik.
- Almaniya klubundan çoxlu qol buraxmaqdan qorxmursunuz?
- (Gülür) Bundan qorxmaq lazım deyil. Sadəcə, "Borussiya"ya belə imkan verməməliyik. Düzdür, bu komanda cari mövsümdə öz meydanında möhtəşəm çıxış edir və onları heç kim məğlub edə bilmir. Amma biz heç kimin bacarmadağını etmək istəyirik.
- Qrupdan çıxmaq və Premyer Liqada çempion olmaq şanslarınızı necə qiymətləndirə bilərsiniz?
- Hadisələri qabaqlamaq istəmirəm. Güclü komandamız var. Düzdür, indi heç də yaxşı günlər yaşamırıq. Amma hər şey o dərəcədə pis də deyil. Komanda özünə gələcək. Psixoloji baxımdan mümkün qədər tez özümüzə gəlməliyik. "Qəbələ" hələ çempion olmaq və Avroliqada qrupdan çıxmaq şansını itirməyib.
