Nelson Bonilya: Zirənin hədəfi mövsümün gedişində dəyişə bilər
"Zirə"nin hücumçusu Nelson Bonilya Topaz Premyer Liqasının 11-ci turu çərçivəsində "İnter"ə qarşı keçirdikləri oyundan (0:0) sonra azerisport.az saytının suallarını cavablandırıb.
- "İnter"lə oyun barədə nə deyə bilərsiniz?
- Rəqibimiz çox çətin idi. "İnter" Premyer Liqanın ən güclü komandalarından biridir. Üstəlik, səfərdə oynayırdıq. Bütün bunları nəzərə alsaq, belə bir rəqiblə heç-heçəni bizim aktivimizə yazmaq olar.
- Yəni nəticə oyuna görə oldu?
- Bərabər səviyyəli oyun idi. Demək olar ki, qol vəziyyətləri də bərabər idi. Onu da nəzərə almaq lazımdır ki, "İnter" avrokuboklara vəsiqə uğrunda, biz isə Premyer Liqadakı yerimizi qorumaq üçün mübarizə aparırıq.
- "Zirə"də hər kəs elitada qalmaqdan danışır, amma qalib gələcəyiniz halda üçüncü ola bilərdiniz...
- Bizim ilkin hədəfimiz elitadakı yerimizi qorumaqdır. Çünki Premyer Liqad debüt mövsümümüzü keçiririk. Üstəlik, komandamız yeni qurulub.
- Turnir cədvəlində dördüncü pillədə yer aldığımızı nəzərə alsaq, "Zirə"nin elitanı tərk etmək qorxusu yoxdur. Komandanız avrokuboklara vəsiqə qazana bilər, ya bunun üçün yetərli gücünüzün olmadığını düşünürsünüz?
- Fikrimcə, mövsümün gedişində hədəfimiz dəyişə bilər. Daha yüksək yerlər uğrunda mübarizəyə qoşula bilərik.
- "Zirə" son dörd turda üç xal qazanıb. Bu, nə ilə bağlıdır?
- Bu, yeni komanda olmağımızdan irəli gəlir. Bizdən hər turda baxımlı oyun gözləmək hələ tezdir. Üstəlik, bizdə sabitlik çatışmır. Fikrimcə, zamanla oyunumuz yaxşılaşacaq.
