Adil Şükürov: İnter Arenada komandama göstəriş verməklə bağlı problem olmayacaq

"Zirə"nin baş məşqçisi Adil Şükürov Topaz Premyer Liqasının 11-ci turu çərçivəsində "İnter"ə qarşı keçiriləcək oyun öncəsi fikirlərini bölüşüb. Azerisport.az saytına açıqlamasında o, bunları söyləyib:

"Bizi çətin rəqibə qarşı oyun gözləyir. Bu oyun bizim üçün turnir cədvəli baxımından da çox vacibdir. Qələbə bizə üçüncü pilləyə yüksəlmək şansı yaradacaq. Bütün oyunlarda olduğu kimi, bu görüşə də qələbə üçün çıxacağıq. Amma heç-heçə də bizim üçün münasib nəticə sayıla bilər. Son oyunda texniki zonadan kənarlaşdırılmağıma gəlincə, qərar artıq qəbul olunub və onu müzakirə etməyə ehtiyac duymuram. Fikrimcə, növbəti oyunda texniki zonada olmamağım komandama təsir göstərməyəcək. Üstəlik, "İnter Arena"da tribunalar meydançaya yaxındır. Belə olan halda komandama göstəriş vermək baxımından çətinlik olmayacaq. Əksinə, oradan meydança daha yaxşı görünür".