Rail Məlikov: Qəbələdən xal aldıqsa, niyə bunu Qarabağla matçda da təkrarlamayaq?
AZAL-ın kapitanı Rail Məlikov Topaz Premyer Liqasının 11-ci turu çərçivəsində "Qarabağ"a qarşı keçirəcəkləri oyun öncəsi fikirlərini açıqlayıb. Azerisport.az saytına açıqlamasında o, bunları söyləyib:
"Bizi ölkənin ən yaxşı komandasına qarşı oyun gözləyir. Son turda biz "Qəbələ"dən səfərdə xal aldıq. Niyə bunu "Qarabağ"la oyunda da etməyək? Qəbələdəki görüşdən öncə də demişdim ki, biz bir və ya üç xal qazanmaq istəyirik. Düzdür, rəqib bizdən daha yaxşı oynadı və bu, başadüşüləndir. Amma biz xal qazanmağı bacardıq və buna görə baş məşqçimizi, komanda yoldaşlarımızı təbrik edirəm. Belə bir rəqibdən xal aldığımız üçün şadam. Bizim indiki hədəfimiz qış fasiləsinədək mümkün qədər çox xal toplamaqdır. Belə olan halda qış fasiləsindən sonra qarşıya qoyduğumuz hədəfə çatmaq bizə daha asan olar. Çünki yeni ildə klubun maliyyə vəziyyətinin də yaxşılaşması gözlənilir. Son turlarda pis təsir bağışlamırıq. Bu seriyanı davam etdirmək çox vacibdir".
