Yuri Vernidub: O, Qəbələyə keçməklə doğru qərar qəbul edib və mən onu dəstəkləyirəm

Ukraynanın "Zarya" klubunun baş məşqçisi Yuri Vernidub bu yay oğlu Vitali Vernidubun "Qəbələ"yə keçməsi ilə bağlı növbəti dəfə fikirlərini bölüşüb. Azerisport.az xəbər verir ki, o, Ukrayna mətbuatına açıqlamasında bunları söyləyib:

"Vitalinin "Zarya"nı "Qəbələ"yə dəyişməsi mənim üçün gözlənilməz olmadı. Əbəs yerə tez-tez "Zarya"da maliyyə problemlərinin olduğunu qeyd etmirəm. Vitalinin isə yaşı ötür, ailəsi var. 28 yaşında belə bir təklif gəldi, o da qəbul etdi. "Qəbələ" rəhbərliyi və məşqçilər onun xidmətində maraqlı olduqlarını bildirdilər. Bu komandanın baş məşqçisi Roman Qriqorçuk uzun müddət Ukraynada çalışıb. Bunun özü də Vitali üçün bir üstünlük idi. Üstəlik, "Qəbələ"nin qarşısına bu mövsüm yüksək hədəflər qoyulub. Komanda çempionluq uğrunda "Qarabağ"la mübarizə aparmalıdır. Amma təbii ki, maliyyə baxımından sabitlik də onun bu kluba keçmək qərarına təsirsiz ötüşmədi. Rusiyadan da ciddi təklif var idi, ona bunu demişdim. Oğlum düzgün qərar qəbul etdi və mən onu dəstəkləyirəm". (sportsdaily.ru)