Ramazan Abbasov: Qarabağa qarşı açıq futbol oynamaq ağılsızlıq olardı
"Rəvan"ın kapitanı Ramazan Abbasov Topaz Premyer Liqasının 10-cu turunda "Qarabağ"a qarşı keçirdikləri oyunu şərh edib. Azerisport.az saytına açıqlamasında o, 0:1 hesabıyla uduzduqları görüşdən sonra bunları söyləyib:
"Azərbaycanın ən güclü komandasına qarşı oynadığımızı yaxşı başa düşürdük. Ötən turda bu komanda "Sumqayıt"a uduzmuşdu və bizimlə oyunda mütləq qələbə qazanmaq istəyində idilər. Elə məhz bu üzdən bizimlə oyuna optimal heyətlə çıxmışdılar. Pis oynamadıq. "Qarabağ"a qarşı açıq futbol oynamaq ağılsızlıq olardı. Bir qol buraxdıq və bu, məğlub olmağımıza səbəb oldu. Təbii ki, belə alınmasını istəməzdik. Çatışmazlıqlarımız çoxdur. Daha yaxşı oynamağa çalışırıq. Bundan sonrakı oyunlarda mümkün qədər çox xal toplamağa çalışacağıq ki, turnir cədvəlində irəliləyək. Növbəti turlarda bu istəyimizə çatacağımıza inanırıq. Yeni baş məşqçinin gəlişindən sonra uşaqlar daha diqqətli oynayırlar".
