Lippert: Ümid edirəm ki, Borussiya Qəbələyə qarşı ən yaxşı oyunçularını buraxmayacaq

AFFA-nın texniki direktoru Bernard Lippert "Qəbələ"nin Avropa Liqasının qrup mərhələsi çərçivəsində Almaniyanın "Borussiya" (Dortmund) klubuna qarşı səfər oyunu öncəsi fikirlərini bölüşüb. Azerisport.az xəbər verir ki, o, bunları söyləyib:

"Borussiya" Dortmundda da ilk dəqiqələrdən pressinq tətbiq etməyə başlasa, "Qəbələ"nin qapısını toxunulmaz saxlaması çox çətin olacaq. Amma ümid edirəm ki, dortmundlular bu görüşə ən yaxşı futbolçularını buraxmayacaqlar. "Qəbələ"ni heç də asan oyun gözləmir. Lakin futbolda hər şey mümkündür. İstənilən halda ən yaxşısına ümid etmək lazımdır".

Lippert Azərbaycanın gənclərdən ibarət yığma komandasının bir müddət öncə AÇ-2017-nin seçmə mərhələsi çərçivəsində Avstriyaya 0:7 hesablı məğlubiyyətinə də münasibət bildirib: "Avstriya ilə oyunda yığmamızın dörd aparıcı futbolçusu meydanda deyildi. Onların da hamısı hücum xəttinin üzvləridir. Birinci hissədə komandamız yaxşı təsir bağışladı. Amma fasilədən sonra nə baş verdiyini müəyyənləşdirmək çətindir. Mən bu məğlubiyyətə görə nə bəraət axtarmaq fikrindəyəm, nə də baş məşqçi Yaşar Vahabzadəni günahlandırmaq".

Almaniyalı mütəxəssisin fikrincə, bu məğlubiyyəti futbolçuların insafına yazmaq lazımdır: "Məğlubiyyətin günahı baş məşqçidə deyil, futbolçuların psixologiyasındadır. Gənclərdən ibarət yığmamızda lider yoxdur və bu, çox pisdir. Bu komandada həmişə problemlər olub. Çünki U-21-ə dəvət alan futbolçular öz klublarında daim ehtiyatda qalırlar. Belədə onlar digər bacarıqları ilə yanaşı, liderlik keyfiyyətlərini də nümayiş etdirə bilmirlər".