Samir Əliyev: İnterlə oyun bizim üçün finala bərabərdir
"Neftçi"nin baş məşqçisi Samir Əliyev Topaz Premyer Liqasının 10-cu turu çərçivəsində "İnter"ə qarşı keçirəcəkləri oyun öncəsi azerisport.az saytının suallarını cavablandırıb.
- AZAL-a məğlubiyyətdən sonra Samir Məsimovla Məhəmməd Qurbanovu əvəzedici komandaya göndərdiniz. Sizcə, məğlubiyyətə səbəbkar onlar idi?
- Xeyr. Hər şeydə günahkar mənəm. Bu iki futbolçu isə əvəzedici heyətə öz işlərinə, məşqlərə məsuliyyətsiz yanaşdıqları üçün göndərilib.
- Elə isə onları əsas komandaya nə vaxt qaytarmağı düşünürsünüz?
- Sizə dəqiq tarix deyə bilmərəm. Bu, 3-5 günə də ola bilər, gec də. Hər şey özlərindən asılıdır.
- Bəs "Neftçi"də oynamasına icazə verilən Cavid İmamverdiyevi nə vaxt əsas heyətdə görəcəyik?
- O da hazırda əvəzedici komandada çıxış edir. Uzun müddət oynamadığından, oyun təcrübəsi yoxdur. Tezliklə onun da xidmətindən yararlanmağa başlayacağıq. Orta sahədə rəqabəti artıracağına inanırıq.
- AZAL-la oyundan sonra qapıçınız Aqil Məmmədovla hücumçu Ruslan Qurbanovun açıqlamaları böyük rezonansa səbəb oldu. Bununla bağlı onlarla söhbət etmisiniz?
- Xoşagəlməz haldır. Ruslanla danışmışam. O, Rail Məlikovla bir komandada çıxış edib. Belə mübahisələr olmamalıdır. Ruslan mənə dedi ki, Raillə artıq şəxsən danışıb və aralarında heç bir problem qalmayıb.
- Komanda uğursuz nəticələrə görə cərimə olunub?
- Hələ yox. Amma bundan sonra da belə olsa, böyük ehtimalla cərimə qaçılmaz olacaq. Komanda beş oyundur qələbə qazanmırsa, o oyunların üçündə uduzursa, deməli, sərt qərarlara ehtiyac var.
- "Qəbələ"yə məğlubiyyətdən sonra istefa versəniz də, rəhbərlik qəbul etmədi. Belə bir istək AZAL-la oyundan sonra da oldu? Ya istefanızın qəbul olunmayacağını düşünüb, susdunuz?
- Getmək asandır. Mən komandanı yarıyolda qoymaq istəmədim. Rəhbərlik, məşqçilər korpusu, futbolçular birgə bu vəziyyətdən çıxış yolu tapmalıdır.
- Qarşıda "İnter"lə oyun var...
- İlk dövrə də göstərdi ki, Premyer Liqada zəif komanda yoxdur. Bunun bariz nümunəsi kimi son turda "Qarabağ"ın "Sumqayıt"a, "Neftçi"nin AZAL-a məğlubiyyəti idi. Bütün rəqiblərə hörmətlə yanaşmaq lazımdır. "İnter"lə oyunumuz finala bərabərdir. Şübhəsiz ki, qələbə qazanmaq istəyirik. Komandada psixoloji problemlər var. Amma qələbə qazanmaqla bu problemi aradan qaldırmaq olar.
- Mümkün uğursuzluq sizi daha bir pillə geri ata bilər...
- Bu barədə düşünmək belə istəmirəm. "Neftçi"nin artıq itirəcəyi heç nə yoxdur. Birinci dövrə bizim üçün dəhşətli alındı. İkinci dövrədə bunu təkrarlamamalıyıq. Qış fasiləsinə kimi vəziyyəti normallaşdırmalıyıq.
