Kamran Quliyev: Bilet satışı faydalı alınsa, stadionun tutumu artırıla bilər
"Sumqayıt"ın prezidenti Kamran Quliyev ev oyunlarını keçirdikləri stadionun azarkeş tutumunu artırmaq imkanlarından danışıb. Azerisport.az saytına açıqlamasında o, bunları söyləyib:
"Qarabağ"la son oyunda boş yer yox idi. Oyuna baxmaq istəyənlər tribunaların tutduğu azarkeş sayından daha çox idi. Bunun da səbəbi bir tur öncə "İnter"ə qarşı uğurlu oyun keçirməyimiz idi. Samir Abasovla komanda fərqli oyun sərgiləyir. Təbii ki, belə olan halda oyunumuza maraq da artıb. Üstəlik, son turda qonağımız ölkə çempionu "Qarabağ" idi. Stadionun tutumunu artırmaq olarmı? Bu, elə də balaca iş deyil. Xeyli maliyyə vəsaiti tələb edir. Amma bu məsələni idman kompleksinin sahibi - "Azərkimya" qarşısında qaldırmaq olar. Komandamız isə sabit oyun sərgiləməyə davam etməlidir. Biz artıq bilet satışı barədə düşünməyə başlamışıq. Bildiyiniz kimi, indi stadiona giriş pulsuzdur. Bu, kluba pul qazandıracaq. Azarkeşlər bilet almağa davam etsələr, yer olmasa, o zaman stadionun tutumunu artırmaq barədə düşünmək olar".
