Yunis Hüseynov: XL artıq indidən bir neçə legionerlə güclənməyə hazırlaşır
"Xəzər Lənkəran"ın baş məşqçisi Yunis Hüseynov Topaz Premyer Liqasının 9-cu turu çərçivəsində "Kəpəz"ə qarşı keçirəcəkləri səfər oyunu öncəsi azerisport.az saytının suallarını cavablandırıb.
- "Qəbələ"yə 0:6 hesablı darmadağından sonra doğma meydanda AZAL-a qalib gəldiniz. Komandanızın həmin psixoloji zərbədən sonra özünə gəldiyini demək olar?
- Bu, elə də asan deyil. Bir qələbə ilə özünə gəlmək çətindir. Uşaqlarla söhbət etmişəm. "Qəbələ"yə məğlubiyyət gənc futbolçularımız üçün böyük zərbə oldu. Buna baxmayaraq, toparlana, AZAL-a qalib gələ bildik. Onları bu oyuna kökləmək mənə çətin oldu. Fikrimcə, həmin darmadağını tam unutmağımız üçün bir neçə ardıcıl qələbə qazanmağımız lazımdır. Yalnız belə olan halda tam da olmasa, psixoloji baxımdan uşaqlar özlərinə gələ bilərlər.
- "Kəpəz"lə oyundan nə gözləyirsiniz?
- Asan oyun gözləmirəm. Bizim üçün çətin səfər olacaq. Heyətlə bağlı itkilərimiz var. Sərəncamımda çox az futbolçu var. "Kəpəz"in isə güclü heyəti var. Yaxşı legionerlər transfer ediblər. Rəqibi analiz etmişəm. Düzgün oynamağa çalışacağıq.
- Siz özünüz Gəncədənsiniz. Doğma şəhərinizin komandasına qarşı oyun sizin üçün hansısa prinsipiallıq daşımır?
- Xeyr. Mənim hədəfim komandamın növbəti oyunda qələbə qazanmasına nail olmaqdır.
- "Neftçi"nin AZAL-a məğlubiyyətini gözləyirdiniz?
- Onların bu məğlubiyyəti mənim üçün gözlənilməz oldu. Amma futbolda belə nəticələr olur.
- "Xəzər Lənkəran" Gəncədə qələbə qazansa, həm "Neftçi"ni, həm də "Kəpəz"i qabaqlayıb, beşinci sıraya yüksələ bilər...
- Bu, bizim üçün yaxşı şansdır, əlavə motivasiyadır. Qələbə qazanmaq üçün əlimizdən gələni edəcəyik.
- Qışda heyəti gücləndirmək üçün hansı işlər görürsünüz?
- Bu yöndə iş gedir. Heyəti gücləndirəcəyik. Bir neçə legioner dəvət edəcəyik. Artıq indidən buna hazırlaşırıq.
