Şahin Diniyev: Qarabağın Monako ilə səfərdə bərabər səviyyədə oynaması sevindirir
"Kəpəz"in baş məşqçisi Şahin Diniyev Avropa Liqasının qrup mərhələsinin üçüncü turu çərçivəsində məğlubiyyətlə üzləşən "Qarabağ"la "Qəbələ"nin müvafiq olaraq Fransa "Monako"su və Almaniya "Borussiya"sına (Dortmund) qarşı oyunlarından danışıb. Azerisport.az saytına açıqlamasında o, bunları söyləyib:
"Borussiya" "Qəbələ"dən bir yox, iki baş üstün olduğunu göstərdi. Üç xal üçün gəlmişdilər, buna da nail oldular. "Qəbələ"nin oyunun ilk dəqiqələrində bir neçə qol vəziyyəti yaratması isə rəqibin komandamızı düzgün qiymətləndirməməsindən irəli gəlirdi. Amma məncə, bizimkilər hətta ələ düşən şanslarından birindən yararlana bilsəydi, rəqib yenə də öz istədiyinə nail olacaqdı. "Qarabağ"a gəlincə, bu komandanın "Monako" ilə bərabər səviyyədə oynaması məni sevindirdi. Bəzi epizodlarda hətta komandamız rəqibdən üstün idi. "Monako" kimi komandalar ən kiçik səhvləri də bağışlmaır. Bir səhv qapımıza vurulan qolla nəticələndi. Amma istənilən halda ağdamlıların səfərdəki oyununu qeyd etmək lazımdır".
