Rikardinyo: Borussiyaya səfərdə qalib gəlməyə çalışacağıq

"Qəbələ"nin müdafiəçisi Rikardinyo Avropa Liqasının qrup mərhələsi çərçivəsində Almaniyanın "Borussiya" (Dortmund) klubuna qarşı keçirdikləri oyundan (1:3) sonra azerisport.az saytının suallarını cavablandırıb.

- Oyunla bağlı nə deyə bilərsiniz?
- Qələbə qazana bilmədiyimiz üçün komandada əhval-ruhiyyə çox pisdir. "Borussiya"da yüksək səviyyəli futbolçular çıxış edir. Oyunun videoyazısına baxacağıq, analizlər aparacağıq. Növbəti oyunda bu görüşdə buraxdığımız səhvləri təkrarlamamağa çalışacağıq.

- Razısınız ki, Dortmunddakı oyun bundan da çətin olacaq?
- Əlbəttə, çətin olacaq. Çünki rəqib çox güclüdür. Digər tərəfdən biz bu komandanın necə oynadığına da şahid olduq.

- Sizə elə gəlmir ki, komandanız matçın əvvəlində ələ düşən qol şanslarını boşa verdiyi üçün uduzdu?
- Həmin qol şanslarından yararlansaydıq, hər şey fərqli də ola bilərdi. Digər tərəfdən müdafiədə daha diqqətli oynayıb, ancaq əks-hücumlarda da çıxış etməyimiz mümkün idi. Hesabda öndə olarkən daha yaxşı oynaya bilərdik, bizə asan olardı. Elə olan halda qələbə dəqazanmaq olardı.

- Artıq qrup mərhələsində üç tur geridə qaldı və bütün rəqiblərinizlə ilk görüşlərdən sonra sonuncu pillədəsiniz. Qrupdan çıxmaq şansınız qalır?
- Şans hələ də var. Çünki qarşıda daha üç oyunumuz var. "Borussiya"ya Almaniyada qalib gəlməyə çalışacağıq ki, şansımızı daha da artıraq.

- "Qəbələ"nin heyətinin əksər üzvü legionerlərdir. Bu heyətlə oynamaq daha asandır, ya azərbaycanlılarla?
- Çətin sualdır. Kimin oynayacağına baş məşqçi qərar verir. Bu suala cavab verə bilmərəm. Məsələn, mən özüm Azərbaycan çempionatında oynamıram.

- Belə bir fikir var ki, legioner limiti ləğv olunsa, Azərbaycan futbolu daha sürətlə inkişaf edər. Siz bu barədə nə düşünürsünüz?
- Dəqiq heç nə deyə bilmərəm. Limitin ləğvi faydalı da ola bilər, zərərli də.

- Oyundan sonra azərbaycanlı futbolsevərlər "Borussiya"nın futbolçuları ilə şəkil çəkdirmək üçün növbəyə dayanmışdılar. Bu, sizin xətrinizə dəymədi?
- Mən özüm "Malmö"də çıxış edərkən Braziliya yığmasının Neymar, Kaka kimi üzvləri ilə şəkil çəkdirirdim. Ona görə də belə şeylərə normal yanaşıram.