Tomas Tuxel: Qəbələ erkən qol vursaydı, bizə çətin olacaqdı
Almaniyanın "Borussiya" (Dortmund) klubunun baş məşqçisi Tomas Tuxel Avropa Liqasının qrup mərhələsinin üçüncü turu çərçivəsində "Qəbələ"yə qarşı keçirdikləri oyunu şərh edib. Azerisport.az xəbər verir ki, o, 3:1 hesabıyla qalib gəldikləri görüşdən sonra bunları söyləyib:
"Oyuna uğursuz start verməyimizin bir neçə səbəbi var. Matçın əvvəlində diqqətli olmadığımızdan rəqib bir neçə təhlükəli hücum təşkil etdi. Amma sonradan özümüzə gəldik və daha inamlı çıxış etməyə başladıq. Biz matçın favoriti idik və qrupdakı vəziyyətimizi yaxşılaşdırmaq istəyirdik. Rəqib ilk dəqiqələrdə qol vura bilsəydi, hər şey bizim üçün pis də alına bilərdi. Çünki tribunalar meydan sahiblərini yaxşı dəstəkləyirdilər. "Qəbələ"yə hörmətlə yanaşıram, yaxşı komandadır. Rəqib düşərgədə hansısa futbolçunu xüsusi qeyd etmək istəməzdim. Yaxşı baş məşqçisi, yaxşı futbolçuları var. Xüsusilə də cinah oyunçuları fəaldırlar. Məsələn, Dodo kimi. Bu oyunda iştirak etməyən Henrix Mxitaryan Dortmunddakı qarşılaşmada meydana çıxacaq".
