Zaur Həşimov: Qarabağın bu qrupdan çıxacağına inanmağım gəlmir

"Qarabağ"ın sabiq futbolçusu Zaur Həşimov Ağdam klubunun Avropa Liqasının qrup mərhələsi çərçivəsində "Monako"ya qarşı səfər oyunu öncəsi fikirlərini bölüşüb. Azerisport.az saytına açıqlamasında o, bunları söyləyib:

"Monako"nun oyunlarını izləməmişəm. Amma istənilən halda güclü klub olduğu bəllidir. Fransa çempionatında çıxış etməsi rəqibin səviyyəsindən xəbər verir. "Qarabağ"ın heyətində ciddi itki olduğunu nəzərə alsaq, çətin oyun olacaq. Fikrimcə, bizim üçün heç-heçə də uğurlu nəticə sayıla bilər. "Monako"nun Fransa çempionatının son turlarında qələbə qazana bilməməsi "Qarabağ" üçün üstünlük sayıla bilməz. Əksinə, ola bilsin ki, onlar bütün güclərini Avroliqaya qoyublar. Bu üzdən "Qarabağ"a da qarşı tam gücləri ilə mübarizə aparacaqlar. Reynaldonun yoxluğuna gəlincə, bu, komandanın oyununa təsirini göstərəcək. Ən azından sürətli keçidləri ağdamlılara çox kömək edərdi. Onun bu görüşdə oynamasını çox istəyərdim. Amma futbol belədir. Zədədən heç kim sığortalanmayıb. Məşqçilər korpusu belə halla ilk dəfə rastlaşmır. Ümid edirəm ki, onun yoxluğunda meydana döyüşkən heyət çıxarmaqda problemlə üzləşməyəcəklər. Samuel Armenteros yaxşı formadadır. "Anderlext"lə görüşdə də yaxşı oynamışdı. Premyer Liqada 4 qol vurub. Amma Reynaldonun öz yeri var, onun da öz yeri. Reynaldo istənilən mövqedə çıxış edə bilər: hücumda, yarımmüdafiədə. Fikrimcə, onların eyni vaxtda meydanda olması komandamıza daha çox fayda verərdi. "Monako" ilə oyunlarda mütləq xallar qazanmaq lazımdır. Yalnız belə olan halda qrupdan çıxmaq şansımız ola bilər. Hər şeyin yaxşı olacağına ümidliyəm. Amma düzünü desəm, "Qarabağ"ın bu qrupdan çıxacağına inanmağım gəlmir. Əlbəttə, bu, futboldur, hər şey ola bilər. "Qarabağ"ı çətin  oyunlar gözləyir. Çünki "Monako" qarşıdakı iki oyunda ancaq qələbəyə oynayacaq".