Ramiz Məmmədov: Qəbələ almanlara uduzmaya, Qarabağ Monakodan xalla qayıda bilər
Azərbaycanlı futbol mütəxəssisi Ramiz Məmmədov "Qarabağ"la "Qəbələ"nin Avropa Liqasının qrup mərhələsinin üçüncü turu çərçivəsində Fransanın "Monako" və Almaniyanın "Borussiya" (Dortmund) klublarına qarşı oyunlar öncəsi fikirlərini bölüşüb. Azerisport.az saytına açıqlamasında o, bunları söyləyib:
"Qarabağ"a Reynaldosuz çətin olacaq. Amma Samuel Armenterosun onu layiqincə əvəzləyəcəyinə inanıram. Yaxşı futbolçudur, transferi də uğurlu alındı. Sadəcə, hələ komandaya tam köklənə bilməyib. Ağdamlılar öz oyunlarını sərgiləyə bilsələr, Monakodan xalla qayıda bilərlər. Ötən mövsüm "Qarabağ"ın səfərdə Ukrayna "Dnepr"inə qalib gəlməsini də gözləmirdim, amma onlar mənim yanıldığımı isbatladılar. Ümid edirəm ki, bu dəfə də yanılacağam və "Qarabağ" Monakodan 3 xalla qayıdacaq".
"Qəbələ"yə gəlincə, rəqib "Borussiya" bu mövsüm klublarımıza qismət olan ən çətin, güclü komandadır. Doğma meydan, azarkeş amili komandamıza uğur qazanmaq yolunda böyük kömək olmalıdır. "Qəbələ" almanlara uduzmaya bilər. Əvvəllər bizi futbol ölkəsi kimi qəbul etmirdilər. Artıq həmin günlər arxada qalıb. Futbolumuzun səviyyəsi yüksəlib".
