Tomas Tuxel: Qəbələ Krasnodara qalib gələ bilərdi

Almaniyanın "Borussiya" (Dortmund) klubunun baş məşqçisi Tomas Tuxel Avropa Liqasının qrup mərhələsinin üçüncü turu çərçivəsində "Qəbələ"yə qarşı keçirəcəkləri oyun öncəsi fikirlərini bölüşüb. Azerisport.az xəbər verir ki, o, bu gün Bakıda baş tutan mətbuat konfransında öncə bunları söyləyib:

- "Qəbələ"nin futbolçuları barədə ayrı-ayrılıqda danışmaq düzgün olmazdı. Rəqib çox güclü komandadır. Onların "Krasnodar"la oyununa baxmışam, yaxşı çıxış ediblər. Qələbə də qazana bilərdilər. "Qəbələ"ni məğlub etmək çətin olacaq. Amma bunun üçün əlimizdən gələni edəcəyik.

- Marsel Şmeltser meydana çıxa biləcək?
- O, oynamaq istəyir. Amma bizim başqa alternativlərimiz də var.

- Oyun öncəsi həyəcan var?
- Bəli, var. Belə gərginlik həmişə olur. Rəqibimizə hörmətlə yanaşırıq. Amma öz gücümüzə də inanırıq. Bizim gücümüz var. 4-4-2 taktikası ilə oynamağı planlaşdırırıq. Qələbə qazanmaq çətin olacaq. Lakin "Qəbələ"yə qarşı ən yaxşı oyunumuzu sərgiləmək istəyirik.

- Henrix Mxitaryanın yoxluğu oyununuza təsir göstərəcək?
- O, siyasi amillər səbəbindən gələ bilmədi. Biz vacib oyunçumuzu itirdik. Amma bizim onu əvəzləyə biləcək futbolçularımız da var.

- Roys əvvəlki formasını bərpa edib?
- O, "Maynts"la son oyumumuzda penaltini dəqiq yerinə yetirə bilməsə də, qol vura bildi. Roys əvvəlki formasını bərpa edir. Son məşqlərdə çox fəaldır. "Qəbələ" ilə oyunda da meydanda olacaq.