Xəzər Lənkəranda 75-ci dubl

Məlum olduğu kimi, ötən bazar AZAL-ı 3:1 hesabı ilə məğlub edən “Xəzər Lənkəran”ın qollarından ikisinə Kamran Abdullazadə, digərinə Sadio Tounkara imza atıb. Azerisport.az xəbər verir ki, bu futbolçulardan biri klub tarixində rəqib qapılarına yol tapanlar siyahısına düşübsə, digəri o siyahıdakı mövqeyini yaxşılaşdırıb.

İki dəfə fərqlənən Abdullazadə “Xəzər Lənkəran”da qol hesabını açıb. Bu matçadək 23-ü çempionatda olmaqla, 27 matçda rəqib qapısına yol tapa bilməyən yarımmüdafiəçi AZAL-la qarşılaşmada dubl müəllifi olub. O, komandasının tarixinə qol sevinci yaşayan 99-cu oyunçu kimi düşüb. Belə ki, 2004-cü ildə yaradılan klubun buna qədərki rəsmi matçlarında 98 futbolçu rəqib qapısına qol vurmuşdu.

Mövsümdə ilk dəfə fərqlənən Tounkara isə “Xəzər Lənkəran”da 18-ci qolunu qeyd edib. Malili yarımmüdafiəçi klub tarixinin ən məhsuldar oyunçuları arasında 6-cı yerə şərik olub. Sadio qol sayında eyni göstəriciyə malik Rəşad Abdullayev, Vüqar Nadirov və Oqtay Dərəlioğluna çatıb. Hazırda Tounkara yalnız 5 futbolçudan - Zaur Ramazanov (44), Samir Əliyev (34), Rahid Əmirquliyev (32), Mario Souza (26) və İvan Svetkovdan (24) geri qalır.

Abdullazadə “Xəzər Lənkəran”ın tarixinə həm də dubl müəllifi olan 40-cı futbolçu kimi düşüb. Onun 2 qola imza atması ilə komandasının ümumilikdə 75-ci dublu rəsmiləşib. Bu matçadək cənublu futbolçular 74 dəfə bir oyunda 2 qol vurmuşdu. Zaur Ramazanov hamıdan çox – 8, Vüqar Nadirov 5, Samir Əliyevlə Etame Mbilla hərəyə 4 qarşılaşmada dubla imza atıb.