İlqar Qurbanov: Monako ilə oyundan ya 1, ya da 3 xalla qayıtmağa çalışacağıq
"Qarabağ"ın müdafiəçisi İlqar Qurbanov Avropa Liqasının qrup mərhələsinin üçüncü turu çərçivəsində Fransanın "Monako" klubuna qarşı keçirəcəkləri oyun öncəsi azerisport.az saytının suallarını cavablandırıb.
- "Monako" ilə oyundan nə gözləyirsiniz?
- Bizi çətin səfər oyunu gözləyir. Gözəl futbol göstərməyə və Azərbaycanı layiqli şəkildə təmsil etməyə çalışacağıq.
- Rəqibiniz Fransa çempionatında elə də uğurlu çıxış etmir...
- Mən belə deməzdim. "Monako" Fransa çempionatında öz gücünü göstərir. Onlar bizimlə də oyuna qələbə üçün çıxacaqlar.
- "Qarabağ" səfərdən 3 xalla qayıda bilər?
- Bakıya ya 1, ya da 3 xalla qayıtmağa çalışacağıq.
- Siz çempionatın son turunda "Zirə"yə asanlıqla qalib gəldiniz...
- Bu oyuna yaxşı hazırlaşmışdıq. Bilirdik ki, "Zirə" yaxşı komandadır. Erkən qol vurmağa nail olduq. Bu, qələbə qazanmağımızda böyük rol oynadı.
- İlk yarıda üç qol vurduğunuz halda, ikinci hissədə sanki oynamaq istəmirdiniz. Gücünüzə qənaət edirdiniz?
- İkinci hissədə də birinci yarıdakı kimi oynadıq. Qol da vurduq. Bizim üçün əsas nəticə idi. Özü də indiki qrafikdə. Ona da nail olduq.
- Komandanızı Dani Kintananın zədələnməsi üzdüsə, Çumbinyonun qayıdışı da sevindirməyə bilməz. O, "Zirə" ilə oyunda da iki qol ötürməsi verdi...
- Çumbinyonun sıraya dönməsinə şadam. Allah eləsin ki, Dani də tezliklə qayıtsın. Onların "Qarabağ"a kömək etməsi əla olardı.
- Çempionluq yolunda "Qarabağ"ın əsas rəqibi "Qəbələ"dir. Sizcə, bu, sonadək belə olacaq?
- Düşünmürəm ki, çempionluq uğrunda mübarizə iki klub arasında getsin. Bizi hələ çoxlu çətin oyun gözləyir. İndidən dəqiq nəsə demək çətindir.
