Neftçi qalmaqallı məsələ ilə bağlı bəyanat yaydı

“Rusiya Futbol İttifaqı" tərəfindən AFFA-ya hər il olduğu kimi, bu il də ənənəvi dəvət göndərilib və Krasnodar şəhərində keçirilən turnirə Azərbaycanı təmsil edən 14 yaşadək futbolçulardan təşkil olunmuş bir komanda dəvət olunub. Azerisport.az xəbər verir ki, “Neftçi” PFK-nın U-14 komandasının ötən mövsüm ölkə çempionatının qalibi olmasını nəzərə alan AFFA bu dəvəti “Neftçi” PFK-ya yönəldib və klub bu yaş qrupuna aid olan komandanı beynəlxalq təcrübəyə yiyələnməsi üçün Rusiyaya ezam edib.

Təəssüf ki, "Rusiya Futbol İttifaqı" turnirin təqvimini və iştirakçı komandaların adlarını yalnız ilk oyun günü açıqlayıb. Turnirdə hər hansı ölkəni təmsil edən yığmanın olmadığını, yalnız klubların iştirakını və 13-14 yaşlı uşaqların çıxış etməsini, bu yaşda futbolçular üçün siyasi proseslərin idman prinsiplərinə mane olmamasının vacibliyini nəzərə alan “Neftçi” PFK komandanın Krasnodar şəhərindəki turnirdə çıxışını davam etdirməsinə etiraz etməyib”.

Təbii ki, medianın bu məsələyə münasibətdə həssaslığı anlaşılandır. Bildiririk ki, gələcəkdə bu kimi məsələlərə daha diqqətlə yanaşılacaq".

Xatırladaq ki, “Neftçi”nin U-14 komandası sözügedən turnirin final matçında Cənubi Osetiyanın “Barsalan” klubunu məğlub edərək çempion adını qazanıb. Amma bu, 20 faizi işğal altında olan ölkəmizin siyasi maraqlarına uyğun olmadığından, ciddi etiraza səbəb olub.